Batys Qazaqstan oblysynda 22 bas iri qara maldy urlaǵan aǵaiyndy eki kúdikti ustaldy, dep habarlaidy "Ult aqparat".
BQO politsiia departamentiniń resmi ókili Bolatbek Belgibekovtiń málim etkenindei, olar Qaratóbe aýdany Tólen aýylynda 2016 jyldan beri osy kezge deiin mal urlyǵymen ainalysqan.
Qazirgi kezde 22 epizodtan turatyn qylmystyq is tergelýde.
Tergeý barysynda aǵaiyndylardyń aýyl turǵyndarynyń jaiylymynda júrgen 22 bas iri qarasyn jasyryn jymqyrǵany, keibireýin osy kúnge deiin tiri kúiinde saqtap, en tańbasyn ózgertip, óz attaryna menshiktep alǵany anyqtaldy. Osylaisha jábirlenýshilerge 4 mln 860 myń teńge shyǵyn keltirgen.
Is barysynda kúdiktilerdiń qylmystyq is-áreketinen tapqan aqshasyna satyp alynǵan avtokólik, et tasityn tirkeme tárkilendi. Basqa da dáleldemeler alynyp, is qujattaryna tirkeldi.
Urylardyń is-áreketi aldyn ala sóz bailasyp, toptasyp, bótenniń malyn birneshe ret jasyryn jymqyrý retinde saralanyp otyr.
«Istiń keń kólemdi ári kóp epizodty bolýyna bailanysty qazirgi ýaqytta tergeý amaldary jalǵasýda. Sonyń qorytyndysyna sáikes aldaǵy ýaqytta QR Qylmystyq protsess júrgizý kodeksi aiasynda protsessýaldyq sheshim qabyldaý úshin sotqa joldanatyn bolady», dedi QazAqparat tilshisine B.Belgibekov.
