Batys Qazaqstan oblysynda 15 jastaǵy qyzdyń turmysqa shyǵý deregi boiynsha tergeý amaldary júrgizilýde, dep habarlaidy "Ult aqparat".
BQO Politsiia departamentiniń baspasóz qyzmetinen málim etkenindei, oqiǵa Bórli aýdanynda boldy.
Biylǵy 16 qyrkúiekte kámeletke tolmaǵan I. degen qyzdyń joǵalyp ketkeni jóninde habar túsken.
Jedel izdestirý sharalary barysynda onyń Oral qalasyndaǵy turǵylyqty mekenjaiy anyqtaldy. Qyz syrtqy belgileri boiynsha dástúrli emes dini aǵymdy ustanatyn J. degen azamatpen shariǵatqa sáikes zańsyz neke qidyrǵan. Neke meshit pen qyzdyń zańdy ókilderiniń, imamdardyń qatysýynsyz qiylǵan.
Jalǵan nekeni jamylǵan J. kámeletke tolmaǵan 2005 jylǵy qyzben jynystyq qatynasqa túsken. Tabylǵan kezde I. qara tústi párenje jamylyp, betin tolyq búrkenip júrgen. Týystarymen barlyq qarym-qatynasty úzýge árekettengen.
J-nyń is-áreketi QR QK 122-baby 1-bóligimen (kórineý on alty jasqa tolmaǵan adammen jynystyq qatynasqa túsý) dárejelenedi. Bul bap boiynsha aiypty dep tanylǵan adam bes jylǵa deiingi merzimge bas bostandyǵyn shekteýge ne sol merzimge bas bostandyǵynan aiyrýǵa jazalanady.
Eske sala keteiik, budan buryn Batys Qazaqstan oblysynda 16 jastaǵy oqýshy qyzdyń ata-anasyna eskertpesten, turmysqa shyqqanyn jazǵan bolatynbyz.
