Foto: te-st.org
Batys Qazaqstan oblysy Terekti aýdany prokýratýrasynyń usynysy boiynsha 14 mektep direktory ákimshilik jaýapkershilikke tartyldy, - dep habarlaidy "Ult aqparat" vedomstvonyń baspasóz qyzmetine silteme jasap.
Aýdan prokýratýrasy júrgizgen taldaý barysynda kámeletke tolmaǵan oqýshylardyń bilim berý mekemesi qabyrǵasynda (14 mekteptiń informatika kabinetinde - esk.) tyiym salynǵan internet-kontentterge erkin qol jetkizý faktileri anyqtalǵan.
"Osylaisha, monitoring barysynda kámeletke tolmaǵandardyń sýitsid pen zorlyq-zombylyq kórinisteri bar ártúrli saitqa erkin kirý múmkindigi bolǵany anyqtaldy.
Jol berilgen tártip buzýshylyqtar úshin oblystyń bilim salasyndaǵy sapany qamtamasyz etý departamentine prokýrorlyq qadaǵalaý aktisi engizildi. Onyń nátijeleri boiynsha Ákimshilik quqyqbuzýshylyq týraly kodekstiń 409-babynyń 7-2-bóligi boiynsha ákimshilik jaýapkershilikke 14 mektep direktory tartyldy" - delingen habarlamada.
Búgingi tańda prokýrorlyq qadaǵalaý aktisimen aýdannyń barlyq bilim berý mekemesinde osyndai internet-saittarǵa kirýge shekteýler qoiylǵan.
