Foto: azh.kz
Batys Qazaqstan oblysy ákimi Nariman Tóreǵaliev Aqsai qalasyndaǵy KKS-Sicim kompaniiasy jumysshylary jalaqyny 50 paiyz ósirý týraly talabymen kelispeidi. Bul týraly ákim seisenbi, 17 qańtarda Úkimet otyrysyna qatysqannan keiin jýrnalister suraǵyna bergen jaýabynda aitty, dep habarlaidy Azattyq.
– Talaptary orynsyz dep oilaimyn. Sebebi olardyń ujymdyq kelisimsharty bar, onyń syrtynda árbir jumysshy men jumys berýshi arasynda jasalǵan jeke kelisimshart bar. Sondyqtan sol kelisimsharttarda qaralǵan ekijaqty mindettemelerde jalaqyny 50 paiyz nemese 100 paiyz kóterý degen joq. Kelisimshartta 20 paiyz degen ǵana bar. Sondyqtan da (talaptary) orynsyz, – dedi Nariman Tóreǵaliev.
BQO ákiminiń sózinshe, mekemede ortasha jalaqy - 280 myń teńge, «eń joǵarǵy jalaqy 800 myńǵa deiin barady».
– (Jumysshylar jalaqyny 20 paiyz kóterýge) kelispese, ári qarai kelisim júrgizemiz. Erteń keshke eń úlken basshysy Italiiadan keledi, shaqyryp jatyrmyz. Sol kelgen soń taǵy sóilesemiz, – dedi Tóreǵaliev.
Buǵan qosa ákim zańǵa siltep, jumysshylar jumysqa shyǵýy tiis, eger shyqpaityn bolsa shara qabyldanady dep eskertti. Sózinshe, úsh myńdai jumysshysy bar KKS-Sicim kompaniiasynyń bes júzge jýyq jumysshysy ereýildep, jumysqa shyqpaǵan.
16 qańtarda Batys Qazaqstan oblysy Bórli aýdany Aqsai qalasyndaǵy Qarashyǵanaq ken ornynda KKS-Sicim jaýapkrshiligi shekteýli seriktestiginiń birneshe júz jumysshysy tańerteńgi saǵat altyda ereýil bastaǵan. Jalaqyny elý paiyz kóbeitýdi talap etken olar jumysqa shyǵýdan bas tartqan.
