Senat depýtaty Darhan Myńbai mikro jáne shaǵyn biznesti 3 jylǵa tabys salyǵynan bosatý jeńildigi – biznestiń tynysyn ashatynyn aitady, dep habarlaidy QazAqparat.
«Ańǵarsańyz, bul jerde Prezident birinshi ret shaǵyn biznesti orta biznesten bólip aityp otyr. Buryn shaǵyn jáne orta biznes dep keldik qoi. Al búgin shaǵyn biznesti qoldaý boiynsha naqty tapsyrmalar berildi. Máselen, shaǵyn biznes ókilderinen úsh jylǵa deiin tabys salyǵy ustalmaityny týraly aitylyp jatyr. Biznestiń joly ashyldy degen oidamyn», - dedi Darhan Myńbai Parlamenttiń birlesken otyrysynan keiin tilshilerdiń saýalyna jaýap bere otyryp.
Senatordyń pikirine qulaq assaq, Qasym-Jomart Toqaev óziniń Joldaýynda barlyq salaǵa bailanysty, ásirese bilim, mádeniet, ekologiia salalaryna qatysty naqty tapsyrmalar berdi.
«Memleket basshysy ekonomikanyń qai salasynan qarajatty únemdeýge bolatynyn da atap ótti. Iaǵni, ol aspannan túsetin qarjy emes – tek únemdeý, memlekettik satyp alý zańyn jetildirý arqyly keletin qarjy. Soǵan bailanysty Parlamentke kóptegen zańdardy ázirleý boiynsha naqty tapsyrmalar berilip otyr. Ásirese, ekologiialyq kodeksterdi qaita qaraýdyń mańyzy zor. Bizdiń qazirgi kásiporyndarǵa bailanysty úlken kómegin beredi dep oilaimyn», - dedi Darhan Myńbai.
Eske sala ketsek, búgin QR Prezidenti Qasym-Jomart Toqaev Qazaqstan halqyna Joldaýyn jariialady. Joldaýda Prezident mikro jáne shaǵyn biznesti tabysqa salynatyn salyqtan 3 jylǵa bosatýdy tapsyrdy.
