Ulttyq palata týraly zańnamaǵa ózgertýler ázirlenip jatyr. Bul týraly «Atameken» Ulttyq kásipkerler palatasy prezidiýmynyń tóraǵasy Raiymbek Batalov aitty, dep habarlaidy QazAqparat.
«Memleket basshysymen kezdesýde palatany transformatsiialaý máselesi, bizdiń kózqarasymyz, tujyrymdamamyz talqylandy. Memleket basshysy biz úshin óte mańyzdy birneshe baǵytty maquldady. Birinshisi - shaǵyn jáne orta biznespen bailanysty máseleler. Eń aldymen óńirlerge nazar aýdarý qajet. Shaǵyn jáne orta biznes boiynsha jekelegen baǵdarlama, damý baǵdarlamasyn engizip, palata jumysyn negizinen óńirlerge qarai qaita pishimdeý qajet. Ákimdiktermen jumys isteý kerek. Bul - jumystyń óte aýqymdy ári mańyzdy maidany. Salalardy damytý, ulttyq palata, jalpy biznes tarapynan saraptamany jaqsartý jeke baǵyt sanalady», - dedi ol QR Prezidenti baspasóz qyzmetiniń Telegram kanalynda jariialanǵan videoda.
Onyń atap ótýinshe, biznesti qorǵaý da mańyzdy baǵyttardyń biri. Bul rette palata sottarmen, Bas prokýratýramen tyǵyz jumys isteýi tiis.
«Memlekettik organdardy ǵana emes, sonymen birge biznes ortany da biýrokratiiadan aryltý óte mańyzdy. Palata belgili bir dárejede ministrlikke ainalǵanyn baiqap otyrmyz. Ony iskerlik ortaǵa ainaldyrýymyz qajet. Bul másele de qoldaý tapty. Ulttyq palata týraly zańǵa ózgertý engizý kerektigi de talqylandy. Qazir osy baǵytta belsendi jumys istep jatyrmyz. Taiaý arada Ulttyq palata týraly zańnamaǵa engiziletin ózgeristerge qatysty usynysymyzdy Úkimetke beremiz», - dedi Raiymbek Batalov.
