Kásipkerler sybailas jemqorlyq pen sheneýnik qysymynan tolyqqandy ári senimdi qorǵanysqa senim arta alady. Bul týraly QR Sybailas jemqorlyqqa qarsy is-qimyl agenttiginiń tóraǵasy Alik Shpekbaev aitty, dep habarlaidy QazAqparat.
«Protecting business and investments» jobasynyń belsendiligi artyp keledi. Búgingi tańda biz jiyntyq investitsiiasy 16 trln teńgeden asatyn 635 kompaniiany súiemeldeimiz. Joba iskerlik ahýaldy jaqsartýǵa úles qosty. Transparency Kazakhstan zertteýine sáikes, saýalnamaǵa qatysqan 5 kásipkerdiń 4-i para bermei, biznes júrgizedi», - dedi Alik Shpekbaev agenttiktiń alqa otyrysynda.
Degenmen, ol áli de kóptegen problemalar bar ekendigin basa aitty.
«Ókinishke qarai, biznes quqyq qorǵaý jáne baqylaý-qadaǵalaý organdary tarapynan qysym kórýde. Sondyqtan sheteldik jáne otandyq investorlardy sybailas jemqorlyqqa qarsy súiemeldeý bizdiń basymdyǵymyz bolyp qala beredi. Árbir parasatty kásipker sybailas jemqorlyq pen sheneýnik qysymynan tolyqqandy ári senimdi qorǵanysqa senim arta alatynyna sendirgim keledi. Bizdiń esigimiz árdaiym ashyq», - dedi agenttik basshysy.
