Orta salmaqta WBO-nyń ýaqytsha álem chempiony atanǵan Jánibek Álimhanuly (12-0, 8KO) otandasy Gennadii Golovkinmen jekpe-jek ótkizýge qatysty suraqqa jaýap berdi, dep habarlaidy Sputnik Qazaqstan.
Denni Dignýmǵa qarsy jekpe-jekten keiin júrgizýshi oǵan GGG-men judyryqtasýǵa usynys jasady.
"Golovkin ylǵi "meksikalyq stil" kórsetýge tyrysatynyn aitady. Sen bolsań, bizge "qazaq stilin" kórsettiń. Golovkinge qarsy shyqqyń kelmei me?", - dep surady júrgizýshi.
Álimhanuly orta salmaqtaǵy barlyq titýldy jeńip alýǵa múddeli ekenin jasyrmady.
"Men qashanda "qazaq stiliniń" qandai ekenin kórsetýge tyrysyp kelemin. Biraq bizdiń saltymyzda jasy kishiler úlkendermen tóbelespeidi. Bálkim, ol sýper orta salmaqqa aýysatyn shyǵar. Al men orta salmaqtaǵy barlyq titýldy jinaimyn", - dep atap ótti qazaq boksshysy.
Jánibek óz divizionynda kez kelgen chempionmen shyǵýǵa daiyn ekenin ashyq aitty.
"Charlo, Andrade... Men qazir ringte turyp, osy salmaqtaǵy árbir chempiondy jekpe-jekke shaqyramyn. Osyndamyn, sizderdi kútip turmyn. Árbir chempion kelip, menimen kúsh synasyp kórsin", - dedi ol.
Aita keteri, búgin otandasymyz Las-Vegas qalasynda britaniialyq Denni Dignýmmen (14-0-1, 8 KO) qolǵap túiistirgen bolatyn. Álimhanuly birinshi raýndta Dignýmdy nokdaýnǵa jiberdi. Al ekinshi raýndta nokaýtqa túsirdi. Osylaisha qazaqstandyq kásipqoi bokstaǵy 12-shi jeńisine qol jetkizip, WBO nusqasy boiynsha orta salmaqta "ýaqytsha" álem chempiony atandy. Al Digným kásipqoi boksta alǵash ret jeńildi.
