Qazaqstan Prezidenti Qasym-Jomart Toqaev Atyraý oblysynyń jurtshylyǵymen kezdesti, dep habarlaidy "Ult aqparat" Aqordaǵa silteme jasap.
Memleket basshysy máslihat depýtattarymen, qoǵamdyq keńes múshelerimen, ziialyq qaýym, ardagerler, kásipodaqtar men jastar uiymdarynyń ókilderimen, memlekettik qyzmetshilermen kezdesti.
– Atyraý oblysy – mádeni jáne adam áleýeti mol aimaq. Óńirdiń jetistikteri jergilikti halyqtyń ómir súrý sapasy men tabysynyń ósýine yqpal etýi tiis. Ákimdik, úkimet, biznes – bárimiz osyǵan basa nazar aýdarýymyz kerek, – dedi Qazaqstan Prezidenti.
Memleket basshysy óńir halqynyń ál-aýqatyn arttyrýdy qamtamasyz etýge, otandyq óndirýshilerdi damytý úshin munai-gaz sektorynyń áleýetin barynsha paidalanýǵa kóńil bóldi. Qasym-Jomart Toqaev Úkimetke úsh iri joba aiasynda ónimderdi satyp alý jáne qyzmet kórsetý isindegi otandyq taýarlar men jergilikti mamandardyń úlesin kóbeitý, sheteldik jáne otandyq jumysshylardy birdei eńbekaqymen qamtamasyz etý jóninde júieli jumys júrgizýge tapsyrma berdi.
– Azamattarymyz sapaly bilim alyp, jalaqysy joǵary jumysqa ornalasýy úshin barlyq jaǵdaidy jasaýymyz kerek. Otandyq kásipkerlerge de aitarym bar. Memlekettiń jáne kez-kelgen kompaniianyń eń basty bailyǵy adam ekenin umytpańyzdar. Bastysy – jańa jumys oryndaryn ashý, jumysshylardyń jalaqysyn arttyrý, – dedi Qasym-Jomart Toqaev.
Qazaqstan Prezidenti ekonomika salasyn ártaraptandyrý, sonyń ishinde polietilen, polipropilen óndirý jáne balyq sharýashylyǵyn damytý jónindegi jobalardy júzege asyrý máselelerine toqtaldy.
– Jergilikti ekonomikanyń munai-gaz jáne munai-himiia keshenderinen basqa da salalaryn damytý qajet. Óńirdiń balyq ónerkásibin qalpyna keltirý jáne osy sektorǵa investorlar tartý kerek. Qabyldanǵan sharalardyń nátije bermei jatqanyn kórip otyrmyz. Bizdiń azamattar naqty ister kútedi. Aýyl sharýashylyǵy ministrligi jáne ákimdik bul máselege basa nazar aýdarýy kerek, – dedi Memleket basshysy.
Qasym-Jomart Toqaev turǵyn úi, ekologiia jáne kólik infraqurylymy máselelerin sheshýge erekshe toqtaldy.
– Naǵyz sapaly jol qandai bolýy kerek? Eń aldymen, sol joldy paidalanatyn turǵyndardy dittegen jerine jyldam jetkizetin qaýipsiz jol bolýy tiis. Jóndelgen joldyń sany emes, sapasy mańyzdy! Ákimdikterdiń jumysyn osy talapqa sai baǵalaityn bolamyn. Mysaly, qazir Inder men Miialynyń arasyndaǵy 120 shaqyrymdy júrip ótý úshin 5 saǵat kerek. Al jóndeýden keiin bul aralyqty 1,5 – 2 saǵattyń ishinde júrip ótýge bolady, – dedi Qazaqstan Prezidenti.
Memleket basshysy el biýdjetin josparlaý kezinde transferlerdiń ádil bólinýi men jemqorlyqqa qarsy jumystardy kúsheitý týraly da aitty.
Kezdesý sońynda Qazaqstan Prezidenti qatysýshylardy Qazaqstan Respýblikasynyń memlekettik rámizderi kúnimen jáne qasietti Ramazan aiynyń aiaqtalýymen quttyqtap, tabys pen baq-bereke tiledi.
Memleket basshysy atqarǵan minsiz eńbekteri úshin birqatar azamatty alǵys hatpen marapattady. Olardyń arasynda Atyraý oblystyq aýrýhanasynyń hirýrgiialyq bólimniń meńgerýshisi A.Dúsipov, «Bolashaq K» qoǵamdyq birlestiginiń menedjeri G.Jumabaeva, munai jáne gaz óńdeý tsehynyń operatory N.Erǵaliev, «Amangeldi atyndaǵy» balyq sharýashylyǵy óndiristik kooperativiniń jetekshisi Ý.Esaliev jáne Atyraý qalalyq №17 orta mektep litseiiniń matematika pániniń oqytýshysy S.Eroshenko bar.
