Pedagog óz logikasyn damytýǵa, kóshbasshylyq daǵdylaryn qoldanýǵa, innovatsiialardy shyǵarmashylyq jolmen engizýge múddeli bolýy kerek. Bul týraly elordada ótip jatqan «Nazarbaev Ziiatkerlik mektepteri» uiymdarynyń «Mektep álemin ózgertetin – ustazdar» halyqaralyq konferentsiiasynda aityldy, dep habarlaidy QazAqparat tilshisi.
«Tek qana pándi bilip qoiý – jetkiliksiz. Muǵalim aldymen ózine-ózi senýi tiis. Ol barlyq oqýshynyń oqyp, dami alatynyna senýi kerek. «Balanyń deńgeii osydan artpaidy» dep birjaqty baǵalaýǵa bolmaidy. Muǵalim óz áreketi arqyly oqýshyny túsinip, qoldai alatynyn kórsete bilýi qajet», - deidi «Nazarbaev Ziiatkerlik mektepteri» Derbes bilim berý uiymynyń Basqarma tóraǵasy Kúlásh Shámshidinova.
Atap ótilgendei, pedagogtyń mádeni-intellektýaldyq deńgeiiniń joǵary bolýy asa mańyzdy.
«Mádeni ziiat deńgeii joǵary mamandar ómirdegi jáne jumystaǵy qiynshylyqtarǵa barynsha moiymai, tiimdi sheshim qabyldaidy. Muǵalimniń óz ziiatkerlik quzyretin damytyp otyrýǵa múmkindigi bolýy tiis. Ol logikasyn damytýǵa, kóshbasshylyq daǵdylaryn qoldanýǵa, innovatsiialardy shyǵarmashylyq jolmen engizýge múddeli bolýy kerek. Ómir boiy bilim alý oqýshylar úshin ǵana emes, ustazdar úshin de mańyzdy», - deidi «Nazarbaev Ziiatkerlik mektepteri» DBBU tóraǵasy.
Sondai-aq, Kúlásh Shámshidinova muǵalim ózin tek qyzmet kórsetýshi ǵana emes, oqýshynyń áleýmettik, mádeni jáne tildik tájiribesin eskerip, olardyń bilim alýyna oń yqpal etetin ózgeristerdi qozǵaýshy kúsh retinde sezinýi tiis ekenin tilge tiek etti.
«Nazarbaev Ziiatkerlik mektepteri» elimizdiń bilim berý júiesinde jańartylǵan bilim berý mazmunyn engizý jaýapkershiligin ózine ala aldy. Ózderińiz bilesizder, 2016 jyldan beri osy máselege bailanysty bizdi kóp synap jatyr. Odan qorqyp otyrǵan joqpyz. Sebebi biz óz mamandarymyzǵa senemiz», - dedi ol.
Eske sala ketsek, elordada myńnan astam pedagogtyń qatysýymen «Nazarbaev Ziiatkerlik mektepteri» uiymdarynyń «Mektep álemin ózgertetin – ustazdar» halyqaralyq ǵylymi-tájiribelik konferentsiiasy ótti.
Onda QR Bilim jáne ǵylym vitse-ministri Sholpan Karinova bilim salasyndaǵy basty strategiialyq baǵyttardyń biri – «Nazarbaev Ziiatkerlik mektepteriniń» tájiribesin Qazaqstandaǵy jalpy bilim berý mektepterine taratý ekendigin aitty.
