Ulttyq qoǵamdyq keńestiń hatshysy Erlan Qarin jańadan qurylǵan uiymnyń buǵan deiingi dialog alańdarynan aiyrmashylyǵy nede bolatynyn túsindirdi, dep habarlaidy QazAqparat tilshisi.
Ortalyq kommýnikatsiialar qyzmetinde ótken brifing barysynda BAQ ókilderiniń saýalyna jaýap bergen Erlan Qarin uiymnyń buǵan deiin jumys istegen dialog alańdarynan aýqymdylyǵymen erekshelenetinin atap ótti.
«Keibir sarapshylardyń áleýmettik jelilerde Ulttyq keńesti buǵan deiin qurylǵan dialog alańdarymen salystyrmaly túrde taldap jatqanyn men de baiqadym. Bul teńeýler durys emes. Sebebi ol alańdar naqty bir másele tóńireginde qurylǵan ýaqytsha dialog alańdary bolatyn. Mysaly, Jer komissiiasy jer týraly zańnamaǵa ózgerister engizý maqsatynda qurylǵan alań bolatyn. Al bul (Ulttyq keńes - avt.) turaqty túrde jumys isteitin konsýltativtik keńes organy bolady. Prezidentke únemi qoǵamdaǵy ártúrli alańdatatyn máselelerdi eskerýge, qoǵam ókilderimen tikelei dialog arqyly pikir almasý barysynda tiisti bastamalardy júzege asyrýǵa múmkindik beretin bolady», - dedi ol.
Ulttyq keńes hatshysy uiymnyń quramyn anyqtaý kezinde turaqty túrde qoǵamdyq máselelermen shuǵyldanǵan, óz salasynyń mamandaryn tartýǵa basymdyq berilgenin aitty. «Qazir bizde sitýtsiialyq liderler kóp. Al biz turaqty túrde elmen jumys istep júrgen adamdardy tartýǵa tyrysty. Sonymen qatar onyń óz salasyndaǵy biliktiligi de eskerildi. Tek «kúiip turǵa taqyryptarmen» ǵana shuǵyldanbai, óz maqsaty men mindetin aiqyn atqaratyn adamdardy toptastyrýǵa tyrystyq», - dedi Erlan Qarin.
Eske sala ketsek, búgin Memleket basshysy Qasym-Jomart Toqaev Ulttyq qoǵamdyq senim keńesi týraly Jarlyqqa qol qoidy. Sondai-aq keńestiń quramyna kimder engeni belgili boldy.
