Qazaqstannyń short-trekten bas bapkeri qazaqstandyq sportshylarynyń Beijiń olimpiadasynda kórsetken nátijesine baǵa berdi, dep habarlaidy QazAqparat.
«Olimpiada kestege sai ótip jatyr. Alda áli shańǵy, short-trek, konki jáne taý shańǵysynan jarys bar. Osyǵan deiingi nátijege kelsek, Abzal Ájiǵaliev medalǵa sál ǵana jetpei qaldy. Degenmen tórtinshi oryndy ielenýdiń ózi ońai emes. Úlken jetistik dep bilemiz. Jalpy short-trek sporty alǵa jyljyp keledi. Árine, jankúierler de, biz de medal kúttik», - dedi Qazaqstannyń ulttyq olimpiada komiteti sport direktsiiasynyń direktory Elsiiar Qanaǵatov Beijińnen onlain formatta ótken baspasóz máslihatynda.
Sondai-aq, Beijiń olimpiadasynda short-trek sportynyń nátijesine qatysty Qazaqstan ulttyq qurama komandasynyń bas bapkeri Mádiǵali Qarsybekov kásibi maman retinde óz pikir bildirdi.
«Short-trek jarysynyń kóbi aiaqtaldy. Endi 1,5 shaqyrymdyq qashyqtyq qana qaldy. Erteń sportshymyz Olga Tihonova júgiredi. Árine Abzala balamyzǵa sáttilik jetispei qaldy, Denisten de úlken úmit kútkenbiz. Denis burylys kezinde tehnikalyq qatelik jiberdi. Áitpese, finalǵa shyǵyp medalǵa talasatyndai-aq sportshy edi. Jazda álem kýbogyna qatysyp sportshylarymyzdyń shymyrlyǵyn shyńdaǵan bolatynbyz. Biz jospardy 90 paiyzǵa oryndadyq», - deidi ol.
