Qazirgi órkenietti memleketterdiń barlyǵy derlik shoqtyǵy biik tarihi tulǵalarymen maqtana alady. Olardyń qatarynda saiasatkerler, memleket jáne qoǵam qairatkerleri, qolbasshylar, aqyn-jazýshylar, óner jáne mádeniet maitalmandary bar. Qazaq jurty da birtýar perzentterden kende emes. Solardyń ishinde Abaidyń orny erekshe. Biraq biz uly oishylymyzdy jahan jurtyna laiyqty deńgeide tanyta almai kelemiz.
Memleket basshysy búgin jariialaǵan «Abai jáne HHI ǵasyrdaǵy Qazaqstan» atty maqalasynda osylai dep jazdy.
«Men kóp jylǵy diplomatiialyq qyzmetimde basqa elderdiń saiasatkerlerimen, túrli sala mamandarymen jii kezdestim. Sheteldiktermen adamzatqa ortaq kóptegen túitkildi máseleler týraly pikir almasyp, oi bólistim. Jalpy, olar Qazaqstannyń saiasi jáne ekonomikalyq jetistikteri jóninde jaqsy biledi. Al, rýhani jáne mádeni qundylyqtarymyzben jete tanys emes. Osy oraida «Nege qazaqtyń bitim-bolmysyn, mádenietin Abai arqyly tanytpaimyz?», – degen suraq týyndaidy.
Ǵulama Abai – qazaq topyraǵynan shyqqan álemdik deńgeidegi kemeńger. Ol kúlli adamzat balasyna aqyl-oidyń jemisin syilady.
Abaidyń aqyndyq qýatynyń tereń tamyryna úńilgen zertteýshilerimiz onyń qazaq folklorynan, Shyǵys pen Batystyń sóz ónerinen, orys ádebietinen, tarihi eńbekterden sarqylmas nár alǵanyn aitady» delingen Prezident maqalasynda.
Sondai-aq, Memleket basshysy aqynnyń dini kózqarasy arqyly da biiktei beretin tulǵa ekenine basa nazar aýdarǵan.
«Abaidyń asqan oishyldyǵy onyń dini talǵam-tanymynan da aiqyn kórinedi. «Allanyń ózi de ras, sózi de ras, Ras sóz eshýaqytta jalǵan bolmas», – deidi ol. Bul oi-tujyrymǵa ol Shyǵys pen Batys filosoftarynyń eńbekterin tereń bilip, zerttep, zerdelep baryp jetkeni anyq. Ol otyz segizinshi qara sózinde Allaǵa degen kózqarasyn tolyq bildiredi. Abaidyń rýhani óresine baǵa bergen dintanýshy filosof ǵalymdar onyń «kámil musylman» uǵymyna erekshe nazar aýdarady. «Kámil musylman» uǵymy tek qazaqqa ǵana emes, búkil musylman álemine qatysty aitylsa kerek. Mine, bizdiń oishyl Abai, hakim Abai – álemdik deńgeide osy dini kózqarasy arqyly da biiktei beretin tulǵa» dep jazylǵan maqalada.
Prezident paiymynsha, elordada barlyq dinniń basyn qosyp, dástúrli jiyn ótkizip kele jatqanymyz ben uly Abai ustanymynyń arasynda ózara úilesimdilik bar.
