Elorda ákimi Altai Kólginov Memleket basshysy Qasym-Jomart Toqaevtyń «Abai jáne XXI ǵasyrdaǵy Qazaqstan» atty maqalasyna orai pikir bildirdi, dep habarlaid "Ult aqparat".
«Búgin Memleket basshysy Qasym-Jomart Kemeluly Toqaevtyń «Abai jáne XXI ǵasyrdaǵy Qazaqstan» atty kólemdi maqalasy jaryq kórip, qoǵam qyzý talqylap jatyr. Abai filosofiiasy ýaqyt ótken saiyn ózektiligin joǵaltpai, kerisinshe, jańa ǵasyrda da ult tárbiesiniń altyn qazyǵy bolatyny jaily atalǵan maqalada jan-jaqty kórsetilgen. Qasym-Jomart Kemeluly maqalasynda bylai dep jazady: «Qazir álem kún saiyn emes, saǵat saiyn ózgerýde. Barlyq salada jańa mindetter men tyń talaptar qoiylýda. Ǵylymdaǵy jańalyqtar adamdy alǵa jeteleidi. Aqyl-oimen ǵana ozatyn kezeń keldi. Zaman kóshine ilesip, ilgeri jyljý úshin biz sananyń ashyqtyǵyn qamtamasyz etýimiz kerek. Bul qadam órkeniettiń ozyq tustaryn ulttyq múddemen úilestire bilýdi talap etedi. Mundai kezde ózimizdiń taptaýryn, jadaǵai ádetterimizden bas tartýymyz qajet. Abaidyń keibir qareketterge kóńili tolmai, »Tereń oi, tereń ǵylym izdemeidi, Ótirik pen ósekti júndei sabap« dep únemi syni kózben qaraýynyń sebebi osynda», - dep jazady qala basshysy Facebook-te.
Onyń atap ótinshe, elordamyzda turǵyndardyń bilim alýyna, ǵylymmen tereń ainalysýyna, jumys isteýine, sportpen shuǵyldanýyna, jalpy ózin-ózi damytýǵa jaǵdai jasalǵan. Adam ózin-ózi úzdiksiz damytýynyń basty kilti – ózin-ózi jeńe bilýi. Erinshektikti, jalqaýlyqty eńserip, eńbek etkende ǵana adam sergek júrmek.
«Biz qalai desek te, Uly oishyl ańsaǵan qoǵam qurýǵa qadam basyp kelemiz. Táýelsizdigimizdiń arqasynda óshkenimiz qaita janyp, ult retinde sanamyz qaita jańǵyryp jatyr. Bul – bizdi qýantady. «Birińdi qazaq, biriń dos, kórmeseń istiń bári bos» degen Abai babamyzdyń birlikke shaqyrǵan sózin uran etip, árqaisymyz óz eńbegimizben aqyryn júrip anyq bassaq, eńbegimiz esh ýaqytta dalaǵa ketpes. Biyl - Uly oishyldyń 175 jyldyǵy. Qasym-Jomart Kemelulynyń qoldaýymen Bilim kúni Nur-Sultan qalasynda №87 qazaq orta mektebi ashyldy. Aita ketý kerek, atalǵan mektepte Abai mýzeiiniń de negizi qalandy. Memleket basshysynyń tapsyrmasyna sáikes biyl elordamyzda «Abai álemi» ortalyǵy ashylady. Qazir ortalyqtyń orny anyqtaldy, qurylysy bastalady. «Abai áleminiń» ult rýhaniiatynyń damýyna zor úles qosary sózsiz», - dedi Altai Kólginov.
