"Biz sensatsiialyq jańalyq izdeitin oqyrmandy tárbielep otyrmyz..."

Astanada qazaq saittary redaktorlarynyń forýmy bastaldy. Sharanyń negizgi maqsaty - qazaq tildi saittardy damytý, kontent sapasyn kóterý, dep xabarlaidy QazAqparat tilshisi.

Forýmnyń birinshi sessiiasynda «Minber» jýrnalisterdi qoldaý qorynyń jetekshisi Esengúl Kápqyzy qazaq saittarynyń negizgi máselelerin atap ótti.

Onyń aitýynsha, qazaq tildi keńistikte qarjy-ekonomikalyq materialdar az. Al saittardyń ózderi jeńil-jelpi taqyryptardan shyǵa almai jatady.

«Qazir biz qandai oqyrmandy tárbielep otyrmyz? Biz búgingi mańyzdy máselelerdi emes, juldyzdar jáne taǵy basqa sensatsiialyq jańalyqty izdeitin oqyrmandy tárbielep otyrǵan siiaqtymyz. Tipti, bes jastaǵy balanyń ózi ánshiniń ómirin bes saýsaǵyndai bilip otyrady. Biraq ózine qajetti aqparattardy bilmeidi. Nege? Óitkeni biz ózimiz qajetti aqparatty bermeimiz», - deidi Esengúl Kápqyzy.

Zertteýge sáikes, sońǵy jyldary qazaq saittarynyń sany ósken. Alaida olardyń arasynda básekelestik tómen bolyp tur. Sebebi sala-sala boiynsha bólinip, tushymdy dúnielerdi jariialaý jaǵy kenjelep keledi. Qazaq saittary bir-biriniń aqparattaryn kóshirip basa salady. Sóitip, kontent birtekti, al qazaq saittarynyń jeke izdenisi, jeke qoltańbasy joq. Mýltimediialyq ónimderdi paidalaný kórsetkishi de tómen bolyp shyǵady.

«Taǵy bir másele ol - taqyryptyń taiazdyǵy. Bul - bizdiń óz qateligimiz. Biz neǵurlym sapaly kontent usynsaq, oqyrmannyń talaby da soǵurlym artady. Sondyqtan taqyryptardyń aiasyn keńeitý kerek. Bizdiń baiqaǵanymyz, qazaq saittary kóteretin birneshe taqyryp bar. Ol - áleýmettik máseleler, til máselesi jáne ulttyq másele. Osy taqyryptardyń tóńireginde kóbirek áńgime qozǵaimyz. Al qarjy men ekonomika salasyna tereńdep ene almaimyz. Negizi, ondai taqyryptarǵa suranys joǵary», - dep atap kórsetti ol.

Osy oraida qor jetekshisi memlekettik tapsyrys máselesine de toqtaldy.

Onyń aitýynsha, qazaq saittary memlekettik tapsyrysqa neǵurlym táýeldi bolsa, taqyryp aiasy soǵurlym taryla túsedi.

«Memlekettik tapsyrys bolmasyn demeimiz. Tapsyrysty alý kerek. Biraq osy máseleniń basqa bir joldaryn qarastyrý qajet. Máselen, memlekettiń ishki kontentke aralaspaýy, ishki kontentti basqarmaýy. Óitkeni búginde biz áleýmettik jelilerden qalyp qoiyp otyrmyz. Qoǵamdyq pikirdi qalyptastyrý jaǵynan buqaralyq aqparat quraldary emes, áleýmettik jelilerdiń úlesi basym bolyp tur», - dedi jýrnalist Esengúl Kápqyzy.