Qazaqstandaǵy adam quqyqtary jónindegi ýákil Elvira Ázimova búgingi Prezident Joldaýyna qatysty pikir bildirdi, dep habarlaidy "Ult aqparat".
«Búgin Parlament sessiiasynyń otyrysy barysyndaǵy Joldaýynda Memleket Basshysy Qasym-Jomart Toqaev qańtar oqiǵalaryna qatysqandarǵa qatysty ishinara raqymshylyq jasaý týraly sheshim qabyldady. Bul sheshim quqyq qorǵaý qoǵamdastyǵy men aiyptalýshylar, sottalǵandar arasynda erekshe atap ótildi», - dep jazdy ol Facebook paraqshasynda.
Ombýdsmenniń aitýynsha, qańtardaǵy oqiǵalar - biz úshin úlken tragediia, sondyqtan naǵyz quqyq buzýshylyq jasaǵandardyń áreketin eshkim aqtamaidy.
«Ókinishke qarai, biraz adam mundai jaǵdaiǵa alǵash ret tap boldy. Olardyń kóbi jappai tártipsizdikke kópshiliktiń yqpalymen jáne ózderiniń basyndaǵy áleýmettik problemalarǵa bailanysty qatysqany anyq. Olardyń birazy kinásin túsinip, ókinip otyr.
Raqymshylyq jasaý týraly sheshim - Prezidenttiń óziniń konstitýtsiialyq quqyǵyn iske asyrýymen qatar, adamgershilik jáne otandastaryna degen senimi dep bilemin. Biz óz halqymyzǵa senýimiz kerek», - dedi Ázimova.
