Qazaqstanda nárestelerdiń týǵanǵa deiin jáne aman-saý dúniege kelýine jaǵdai jasaýymyz kerek. Mundai pikirdi QR Balalar quqyǵy jónindegi ýákil Arýjan Sain aitty, dep habarlaidy QazAqparat.
«Balalalardyń múgedektigin azaitý jumysynyń mańyzy óte zor. Bir mysal aita keteiin. Qazirgi ýaqytta nárestelerdiń soqyr bolyp qalý epidemiiasy órship tur. Keide balalar shala týady. Bul balalarda kóz tamyrlary qalyptasyp úlgermeidi. Shala týǵan náresteni aman alyp qalýdyń eki meditsinalyq joly bar: biri – kózge ota sheńberinde lazerli korrektsiia jasaý, ekinshisi – medikamentozdy amal. Alǵashqy táýlikte osy meditsinalyq kómekti qabyldasa, balalardyń kórý qabileti qalpyna keledi. Al mundai meditsinalyq kómek Almaty men Shymkenttegi perzenthana ortalyǵynda ǵana kórsetiledi. Sondai kómek beretin ortalyq júiesi Nur-Sultanǵa da engizilip jatyr», - dedi Arýjan Sain OKQ-da ótken baspasóz máslihatynda.
Onyń aitýynsha, mundai kómekti ýaqtyly ala almaǵan balalar ómir boiyna soqyr bolyp qalady.
«Bul ádil de, durys ta emes. Bul ótkir máseleni ata-analar da, úkimettik emes uiymdar da kótergen. Qazaqstannyń Balalar quqyǵy jónindegi ýákili retinde dál osy tapsyrmany aldymen oryndap, barlyq perzenthanalarda atalmysh meditsinalyq kómektiń qoljetimdi bolýyn qamtamasyz etsek deimiz. Sal aýrýymen týatyn balalarda da osyndai másele bar. Biz nárestelerdiń týǵanǵa deiin jáne aman-saý dúniege kelýine jaǵdai jasaýymyz kerek», - dedi ol.
Arýjan Sainnyń sózinshe, 1990 jyly Qazaqstanda 100 myń halyqqa shaqqanda - sal aýrýy diagnozy 23,5 jaǵdai bolatyn.
«Al 2017 jyly 100 myń halyqqa shaqqanda tserebraldy paralich (DTsP) diagnozy bar 83,5 jaǵdai tirkelip otyr. Eń qorqynyshtysy, bul úreili statistika tómendeitin emes. Nelikten? Sebebi, aldyn alý jumystaryn júrgizbeimiz. Ekinshiden, mundai jaǵdaidyń aldyn alý úshin aralasý elementteri bizde joqtyń qasy. Bala týar aldynda nemese týǵan kezde, eń bastapqy kezeńde qaýipti jaǵdailardyń aldyn alý kerek», - dedi QR Balalar quqyǵy jónindegi ýákili.
