Qazaqstan Prezidenti Qasym-Jomart Toqaev kórshi Qytai Halyq Respýblikasyna qatysty óz ustanymyn bildirdi, dep habarlaidy Sputnik Qazaqstan.
"Aldymen Qytaidyń bizdiń eń jaqyn kórshimiz ekenin túsinýimiz kerek. "Qudai qosqan kórshi" deidi ǵoi. Al kórshini aýystyrýǵa bolmaidy. Ol – bir. Ekinshiden, Qytai ekonomikalyq turǵyda óte úlken jetistikterge jetti. Qytai joǵary tehnologiialar men jasandy intellekt jaǵynan jetekshi memleket bolyp sanalady", - dedi Toqaev "Habar 24" arnasyna bergen suhbatynda.
Memleket basshysynyń aitýynsha, Qytaimen seriktestik bailanys ornatý kerek. Oǵan qosa, Qazaqstan kórshi eldiń naryǵyna táýeldi.
"Bizdiń strategiialyq mańyzy bar ónimderimizdi, aýyl sharýashylyǵy ónimderin shyǵaratyn kásipkerler Qytai naryǵyna senip otyrady. Ony joqqa shyǵara almaimyz. Al antiqytailyq narazylyqtardy ótkizetin adamdar, árine, óziniń saiasi múddelerin kózdeidi. Bálkim, olar bizdiń ekonomikamyzdyń suranysyn túsinbeidi. Jalpy ekonomikalyq máselelerdi bilmeitin shyǵar. Olarǵa begili bir qorlardan jáne basqa da qurylymdardan aqsha tólenýi de múmkin. Óitkeni álemdik qaýymdastyqta geosaiasi arazdyqty týǵyzý áreketi baiqalady", - dep atap ótti Toqaev.
Memleket basshysy Qytaidyń osy ýaqytqa deiin Qazaqstanǵa eshqandai jamandyq istemegenin eske saldy. Al eki eldiń saýda-sattyǵy jyl saiyn artyp keledi. Byltyr on bir aidyń ishinde taýar ainalymy 17 milliard dollarǵa jetti.
"Bul – úlken kórsetkish. Sondyqtan biz Qytaimen saýda-ekonomikalyq jáne investitsiialyq yntymaqtastyǵymyzdy ary qarai damytýǵa múddelimiz. Qytaidy zertteýimiz kerek, qytai tilin úirenýimiz kerek. Men eki qoldy kóterip, Qytaiǵa berilýdi aityp otyrǵan joqpyn. Biz onyń myqty el ekenin túsinýimiz kerek. Onymen qarym-qatynasymyz da jaqsy bolýǵa tiis", - dedi Toqaev.
