QR bala quqyqtary jónindegi ýákil Zaǵipa Balieva 7 jasar balanyń isine qatysty tolyq ári keshendi saraptama júrgizilýi kerektigin aitty, dep habarlaidy Sputnik Qazaqstan tilshisi.
"Biz eń áýeli balanyń densaýlyǵyn oilaýymyz kerek. Sondyqtan da bir ǵana tolyq ári keshendi saraptama júrgizilgeni jón. Saraptamaǵa joǵary bilikti mamandardy, qos taraptyń ókilderin tartý qajet. Erteń saraptama nátijesi shyqqanda, áldekim kóńili tolmai, zańsyz júrgizildi dep qaita saraptama ótkizýdi talap etpeitindei jasalýy kerek. Balanyń psihikasy, densaýlyǵy úshin bul óte mańyzdy. Tergeý jurtshylyqty saraptama nátijesinen habardar etedi dep oilaimyn", — dedi Balieva.
Ol búgin basqa da táýelsiz sarapshylarmen saraptamaǵa kirgizý týraly ótinish jazatynyn aitty.
"Tergeýge saraptamaǵa qatysý týraly ótinish jazamyn. Biraq meni kirgize me joq pa, ol jaǵyn bilmeimin. Óitkeni sarapshylarǵa qoiylatyn talaptar bar. Kásibi mamandardy tartady", — dedi Balieva.
Bala quqyqtary jónindegi ýákil tergeýiniń saraptamany belgilegenin atap ótti.
"Tergeýshi saraptamany belgiledi, sondyqtan ol mindetti túrde júrgiziledi. Qazir tergeýshi osynda, memlekettik organdarmen birlesip bilikti mamandardy jinap jatyr", — dedi ol.
Eske salyp ótsek, úsh-tórt kún buryn otandyq BAQ betinde "Abai aýylyndaǵy mektepterdiń birinde 7 jasar balany joǵary synyp oqýshylary birneshe ret zorlaǵan" degen aqparat taraǵan edi. Saryaǵash aýdanyna qarasty Abai aýylynda bar-joǵy birinshi synypta oqityn oqýshyny ózinen 7-8 jas úlken 4 oqýshy 5 ai boiy zorlap kelgen kórinedi. Jábir kórdim degen bala bul týraly týystaryna byltyr tamyz aiynda aitqan eken. Sodan beri politseilerge neshe márte barǵanymen tártip saqshylary shaǵymdy tek qańtar aiynda qabyldapty.
Alaida sot-meditsinalyq saraptama qorytyndysy birinshi synyp oqýshysyna seksýaldy sipattaǵy zorlyq-zombylyq jasalǵanyn teriske shyǵardy.
Bala quqyqtary jónindegi ýákil Zaǵipa Balieva Shymkent qalasyna baryp, 7 jasar búldirshindi ájesimen birge Astanaǵa alyp keldi. Qazir balanyń jaǵdaiy jaqsy, onymen psihologtar jumys istep jatyr.
Keshe OQO ákimi Janseiit Túimebaev Saryaǵash aýdany, Abai aýylyndaǵy mektepte bolǵan keleńsiz jaǵdaiǵa bailanysty jaýapty tulǵalarǵa shara qoldandy. Atap aitsaq, QR zańyna sáikes oblys ákiminiń orynbasary U.Sádibekovke qatań eskertý berildi. Sondai-aq, Saryaǵash aýdandyq jergilikti politsiia qyzmeti basshysy O.Berdaly men Saryaǵash aýdany, Abai aýyldyq jergilikti politsiia bólimshesiniń basshysy Á.Ibragimov, iývenaldy politsiia bólimshesiniń №73, №74 jalpy orta mektepterine jaýapty politsiia inspektory Q.Sáriev qyzmetinen bosatyldy.
