Prezident Qasym-Jomart Toqaev Atyraý óńiriniń jurtshylyǵymen kezdesýinde esirtkige qarsy kúres hám urpaq densaýlyǵy týraly sóz qozǵady, - dep habarlaidy "Ult aqparat" Aqordanyń baspasóz qyzmetine silteme jasap.
«Biz búkil qoǵam bolyp esirtkige qarsy tabandy túrde kúresýge tiispiz. Bul urpaqtyń densaýlyǵyn saqtaý úshin óte mańyzdy. Jastardyń jat qylyqqa boi aldyrýyna jol bermeýimiz kerek.
Qazir eresekterdiń ermegine ainalǵan elektrondy temekige oqýshylar da áýestenip barady. Mundai temekini balalar dúkennen esh kedergisiz satyp alady. Bul – qaýipti jaǵdai.
Bizde alkogol ónimderin 21 jasqa tolmaǵan azamattarǵa satýǵa tyiym salynǵan. Biraq bul talap is júzinde oryndala bermeidi. Quzyrly organdar baqylaýdy kúsheitýi kerek.
Qoǵamda energetikalyq sýsyndardy jastarǵa satýǵa tyiym salý qajettigi jii aitylady. Úkimet bul máseleni muqiiat zerdelep, naqty sheshim qabyldaýy kerek.
Muhtar Áýezovtiń «El bolamyn deseń, besigińdi túze» degen sózi bar. Biz urpaqtyń densaýlyǵyn jáne tárbiesin búgin oilamasaq, erteń kesh bolýy múmkin» - dedi Memleket basshysy.
Prezident osy oraida sport infraqurylymyn damytyp, ony barynsha qoljetimdi etý – mańyzdy mindettiń biri ekenin aitty.
«Óńirdegi kóptegen sport nysanyna jóndeý júrgizý qajet. Sonymen birge respýblikalyq jáne halyqaralyq jarystar ótkizetin jańa sport keshenderin salý kerek.
Jalpy, kóp shyǵyndy talap etpeitin sport túrlerin damytqan jón. Mysaly, shahmat, ústel tennisi, toǵyzqumalaq, sadaq atý, qazaqsha kúres, taǵy basqa. Bul qadam, eń aldymen, balalarymyzdy teris ádetten alystatady jáne sport zaldarynyń tapshylyǵyn azaitýǵa múmkindik beredi. Ákimdikke osy sharýalardy pysyqtaýdy tapsyramyn.
Taǵy bir aitaiyn degenim, eskertkishter qoia bergennen góri, sport jáne meditsina nysandaryn salýǵa basa nazar aýdarý qajet. Bul - Atyraý oblysyna ǵana emes, búkil elimizge qatysty másele» - dedi Toqaev.
