Qazaqstan Prezidenti Qasym-Jomart Toqaev Almaty qalasyn odan ári damytý máseleleri jóninde ótken keńes barysynda Almatynyń densaýlyq saqtaý salasynyń kúrdeli ahýalyna toqtaldy, dep habarlaidy "Ult aqparat".
Memleket basshysynyń aiýynsha, bul saladaǵy kóptegen kókeitesti máseleler koronavirýspen kúrestiń kóleńkesinde qalyp qoiyp jatyr.
– Jalpy azamattardyń meditsinalyq qyzmet kórsetý sapasyna kóńili tolmaitynyn aitýymyz kerek. Meditsina kadrlarynyń jetispeýshiligi de kóptiń kókeiindegi kúrmeýli másele. Bul problema jyldar boiyna sheshilmei kele jatyr. Ásirese, keshegi tótenshe jaǵdai rejimi kezinde bul máseleniń ózektiligi arta tústi. Qalaǵa 300-ge jýyq dáriger qajet. Bul óte kóp. Eger Almatyda jaǵdai osyndai bolsa, onda shet jatqan aimaqtar týraly ne aitýǵa bolady?! Atalǵan jaǵdaidy qalanyń densaýlyq saqtaý basqarmasyndaǵy kadrlardyń toqtaýsyz aýysýy ýshyqtyryp jiberip otyr. Onda jemqorlyqqa qatysty zań buzýshylyqtar oryn aldy. Qalai aitsaq ta, densaýlyq saqtaý basqarmasynda turaqtylyq bolǵan joq. Ákimdik bul máselelerdi sheshýmen naqty ainalysý kerek, – dedi Memleket basshysy.
Prezident elimizdegi epidemiialyq ahýaldyń turaqsyz ekenin aita kele, qala turǵyndary men biznes ókilderi indetten saqtanýǵa asa mán bermei, ony elemei júrgenin atap ótti.
– Men taǵy da otandastarymyzdy sabyr saqtaýǵa, barlyq sanitarlyq normalardy qatań ustanýǵa, koronavirýsqa qarsy jappai vaktsinatsiiany qoldaýǵa shaqyramyn. Úkimet pen ákimdikter jappai vaktsinatsiia júrgizýge daiyn bolýy kerek. Biz 1 aqpannan vaktsinatsiia jumysyn bastadyq. Biraq dál qazirgi ýaqytqa deiin vaktsina saldyrǵan azamattardyń sany 19 myńnan sál ǵana asady. Jospar boiynsha biz 6 millionnan astam adamǵa vaktsina saldyrýymyz kerek. Eger óz óndirisimizdiń qýaty men Reseiden ákelinetin vaktsina jetpei jatsa, onda naryqqa shyǵyp, qajetti kólemdi importtaý qajet. Jappai immýnitet qalyptastyrmai aýrýdy jeńe almaimyz, ekonomikany qaita qalpyna keltirý de múmkin emes. Úkimetke atalǵan jumysty jandandyrýdy tapsyramyn. Bul máseleni ózim baqylap otyramyn. Vaktsinatsiiaǵa durys qaraý kerek, budan basqa jol joq. Osy máseleni azamattardyń esine taǵy bir márte salǵym keledi, – dedi Memleket basshysy.
