2020 jyldyń 1-toqsanynda poiyzdarda biletsiz jolaýshy tasymaldaýdyń 120-ǵa jýyq faktisi anyqtaldy. Bul týraly «Adal jol» jobalyq keńseniń basshysy Islambek Maishekin aitty, dep habarlaidy "Ult aqparat".
«Osy jyldyń 1 toqsanynda 170 reid júrgizilip, onyń barysynda biletsiz jolaýshy tasymaldaýdyń 120-ǵa jýyq faktisi anyqtalǵan bolatyn. Anyqtalǵan faktiler boiynsha poiyz qyzmetkerleriniń ústinen tiisti ákimshilik hattama toltyryldy. Eger ótken jyldyń osyndai kezeńimen salystyrar bolsaq, faktilerdiń sany eki esege qysqaryp otyr. Degenmen, úsh aidyń ishinde 120 faktiniń anyqtalýy problemanyń áli qalǵandyǵyn kórsetedi», - dedi jobalyq keńse jetekshisi.
Onyń atap ótýinshe, ótken jyly bilet satýdyń jańa baǵdarlamasy iske qosylyp, jolaýshylar tasymalyna qatysty normativtik-quqyqtyq aktilerge, Ákimshilik quqyq buzýshylyq týraly kodekske ózgerister engizildi. Nátijesinde biletterdi jappai satyp alý 60 paiyzǵa tómendep otyr.
