Aqparattyq qaýipsizdikti qamtamasyz etý maqsatynda biyldan bastap oqýshylardy testileý «1 kompiýter - 2 kamera - 1 testilenýshi» qaǵidaty boiynsha júrgizilýde, dep habarlaidy QazAqparat.
Iaǵni, oqýǵa túsýshiniń test tapsyrý ornynda negizgi kameradan basqa, jeke tulǵany sáikestendirýge jáne bógde adamdardyń kirýine jol bermeýge múmkindik beretin, onyń dybysyn jazý jáne qozǵalysyn tirkeý úshin aldyńǵy veb-kamera ornatylǵan. Bul týraly Ulttyq testileý ortalyǵynyń direktory Rýslan Emelbaev áleýmettik jelidegi paraqshasyna jazdy.
«UBT-nyń bazasyna «Qazaqstan tarihy» páni boiynsha kontekstik test tapsyrmalary qosyldy. Bul tapsyrmalar tereń bilimdi, aqparatty taldaý siiaqty keń aýqymdy daǵdylar men qabiletterdi baǵalaidy. UBT tapsyrǵan testilenýshilerge árbir pán boiynsha jeke taqyryptyq taldaý usynylady. Bul taldaý UBT-ǵa túsýshilerdiń daiyndyǵyn arttyrýǵa jáne ózderiniń bilim deńgeiin baǵalaýǵa kómektesedi.
Erekshe bilim berý qajettilikteri bar balalar úshin de jaǵdailar jasaldy. UBT-2022-de kórý, estý, tirek-qimyl apparatynyń fýnktsiialary buzylǵan erekshe qajettilikteri bar balalarǵa qosymsha testileý ýaqyty (40 minýt) berildi. Sonymen qatar, olar úshin sýretsiz, syzbalarsyz jáne diagrammalarsyz test nusqalary jasaldy», - degen jazbasynda ortalyq basshysy.
Onyń sózinshe, 2022 jylǵy túlekterdi qoldaý maqsatynda ári UBT-ǵa daiyndyqtaryn ońtaily uiymdastyrý úshin byltyrǵydan da kóp bilim berý ortalyqtarynyń qatysýymen tegin onlain sabaqtar ótkizilýde.
«2022-2023 oqý jylynan bastap IT baǵyt boiynsha oqýǵa túsýshiler UBT-da «Matematika+Fizika» ornyna «Matematika+Informatika» kombinatsiiasyn tapsyrady. 2021-2022 oqý jylynda beiindik pán «Fizika» bolyp qala beredi, bul rette pilot retinde talapkerlerdiń tańdaýy boiynsha biyl osy daiyndyq baǵyttaryna (naýryzdaǵy UBT kezinde) túsý úshin «Matematika +Informatika» kombinatsiiasyn tańdaý optsiiasy qosymsha qoljetimdi boldy. Bul kombinatsiiany naýryz aiyndaǵy testileý barysynda 800-ge jýyq adam tańdaǵan.
Alǵash ret elimizdiń pedagogteri úshin Ulttyq biliktilik testileýine daiyndalýǵa arnalǵan keńes berýler usynyldy. Olar ortalyqtyń YouTube arnasynda saqtalǵan», - dedi Emelbaev.
Jazbada oqýshylardyń pikirin eskere otyryp, biyl túlekterge bilim berý grantyn taǵaiyndaý konkýrsyna qatysý úshin ótkiziletin maýsym aiyndaǵy UBT-ǵa 2 ret qatysý múmkindigi berilgeni sóz bolǵan. Negizgi UBT-nyń aldynda psihologiialyq qoldaý maqsatynda talapkerlerge UTO-nyń áleýmettik jelilerdegi paraqshalarynda psihologtyń onlain keńesteri jariialanady.
«QAZTEST júiesi boiynsha testileýdi elektrondy formatta ótkizý josparlanýda. Syrtqy emtihandardyń barlyq túrlerin uiymdastyrý jáne ótkizý júiesin jetildirý boiynsha jumys jalǵastyrylatyn bolady. Bizdiń basty maqsatymyz – testileý protsedýrasynyń ashyqtyǵyn, akademiialyq adaldyqty qamtamasyz etý», - dep jazdy ortalyq basshysy.
