Búgingi Úkimet otyrysynda QR Bilim jáne ǵylym ministri Ashat Aimaǵambetov alda ótetin Ulttyq biryńǵai testileýdiń daiyndyq jumystaryn baiandai kele biylǵy talapkerler úshin qandai jeńildikter jasalǵanyn jetkizdi, dep habarlaidy Baq.kz agenttigi.
«Ulttyq biryńǵai testileý 16 jylǵa jýyq ýaqyt boiy ótkizilip keledi. Osyǵan deiin testileýge 1 mln 800 myńǵa jýyq adam qatysty. Jalpy Ulttyq biryńǵai testileý formaty biylǵy jyly ózgergen joq. Iaǵni tapsyratyn pánder, suraqtar, upai sany, ýaqyty burynǵy formatta qaldy. UBT-ǵa tapsyrý úshin 117 242 adam ótinish berdi. Onyń ishinde 96 myńnan astamy osy jylǵy mektep túlekteri nemese barlyq mektep bitirýshilerdiń 72%. 20 myńnan astamy biylǵy jáne ótken jyldary kolledj ben sheteldik bilim berý uiymdarynyń bitirýshileri», - dedi ministr.
Sondai-aq, ol biyl testileý maýsymnyń 20-30 aralyǵynda óteinin jáne barlyǵy 169 tapsyrý pýnkti bekitilgenin jetkizdi.
«Testileýdi ótkizý jáne baqylaý jasaý úshin óńirlerge ministrliktiń arnaiy ókilderi jiberildi. Qazirgi ýaqytta testileý materialdary qupiia rejimde óńirlerge tolyǵymen jetkizildi. UBT-ny uiymdastyrý úshin memlekettik komissiialar quryldy. Onyń quramyna quqyq qorǵaý organdarynyń, qoǵamdyq birlestikterdiń jáne BAQ ókilderi enip, osy jumystyń bastaýǵa daiyn. Respýblikalyq deńgeide jáne jergilikti árbir UBT ótkizý pýnktinde apeliatsiialyq komissiialardy qurdyq, olar óz jumysyn bastaýǵa daiyn. Barlyq aýditoriialar 100% uialy telefon signaldaryn óshiretin quraldarmen jáne baqylaý beinekameralarymen jabdyqtaldy», - dedi A. Aimaǵambetov.
Ministr sóz arasynda osy jyly talapkerlerge birqatar jeńildikter engizilgenin aityp, olardyń árbirine toqtalyp ótti.
«Birinshiden, biyldan bastap aqyly oqýǵa túsý úshin UBT jylyna tórt ret ótkizilip otyr. Bul oqýshylarǵa psihologiialyq qysymdy azaitýǵa jáne maýsym aiynda ótetin UBT-ǵa jaqsy daiyndyqpen daiyndalýǵa úlken úlken múmkindik beredi. Ekinshiden, kolledj túlekterine de jeńildikter jasalyp otyr. Olar bitirgen mamandyǵy boiynsha JOO-ǵa aqyly negizde oqýǵa túsemin dese UBT-dan bosatylyp, tek emtihan tapsyrady. Úshinshiden, IELTS halyqaralyq sertifikaty bar túlekter shet tili páni boiynsha testileýden bostatylady. Olarǵa osy pán boiynsha joǵarǵy ball avtomatty túrde beriledi. Qazirgi tańda UBT-ǵa tapsyrýshylardyń arasynda IELTS sertifikaty bar balalar sany - 708». Tórtinshiden, ár bitirýshige UBT sertifikatymen birge arnaiy aqparattyq paraq beriledi. Onda mamandyqtar tizimi, oǵan sáikes bólinetin grant sany, sondai-aq ótken jyly grant baiqaýynyń nátijeleri, iaǵni ótý bally kórsetiledi. Bizdiń oiymyzsha. bul málimetter talapkerlerge bolashaq mamandyǵyn durys anyqtaýǵa jáne jinaǵan ballyna sáikes tańdaýǵa múmkindik beriledi», - dedi ministr.
