Ulttyq sanaqta aiqyndalatyn derekterdiń kóbi memlekettik bazalarda joq. QR Premer-Ministriniń birinshi orynbasary Álihan Samaiylov Úkimet otyrysynda osylai málimdedi, dep habarlaidy QazAqparat.
«Biz halyq sanaǵyn BUU jariialaǵan 2020 jylǵy halyq jáne turǵyn úi qory sanaqtarynyń Dúniejúzilik raýndy aiasynda ótkizemiz. Sanaq barlyq elderde ótkiziledi, biyl álemniń 61 elinde sanaq júrgizý josparlanǵan. Bilim berý, kóshi-qon, tabys, jumyspen qamtý, neke jaǵdaiy, bala týý, bala týýdy josparlaý, tilderdi meńgerý dárejesi, dinge kózqaras jáne adamnyń tynys-tirshiligin shekteitin faktorlardyń bolýy siiaqty máseleler boiynsha tolyq aqparatty alýǵa tek jappai sanaq qana múmkindik beredi. Bundai derekter memlekettik bazalarda joq», - dedi Úkimet basshysynyń birinshi orynbasary.
Onyń sózine qaraǵanda, sanaq júrgizý kezinde qaǵazdyń ornyna planshet qoldaný sharanyń shyǵyndaryn birshama azaitpaq.
«Tsifrlyq tehnologiialardyń engizilýine, protsesti avtomattandyrýǵa jáne qaǵaz qujattyń ornyna planshetterdi qoldanýǵa bailanysty sanaq 2009 jylǵy sanaqtyń shyǵyndaryna qaraǵanda 2,6 ese arzan. Bul rette derekterdiń sapasy men aqparatty jinaý jedeldigi aitarlyqtai jaqsarady. Sanaq aiaqtalǵan soń planshetter mektepter men aýrýhanalarǵa beriledi. Sanaq júrgizý - búkil qoǵamnyń qatysýyn talap etetin aýqymdy is-shara. Sonymen birge, taldaý keibir óńirlerde, atap aitqanda Mańǵystaý oblysynda, Shymkent qalasynda, Aqtóbe jáne Qaraǵandy oblystarynda daiyndyq jumysy tiisti deńgeide júrgizilmei jatqanyn kórsetedi.
Osyǵan bailanysty barlyq jergilikti atqarýshy jáne ortalyq memlekettik organdar Is-sharalar josparyn qatań ustanýy jáne belgilengen merzimderde ulttyq halyq sanaǵynyń sapaly júrgizilýin qamtamasyz etýi qajet», - dedi Álihan Smaiylov.
