Biylǵy naýryz aiynan bastap benzin men bitýmdy taýar birjalary arqyly ótkizý josparlanǵan. Bul týraly QR Energetika ministrliginiń alqa májilisinde vedomstvo basshysy Nurlan Noǵaev málim etti, dep habarlaidy "Ult aqparat".
«Prezident Joldaýynyń aiasynda munai ónimderi men elektr energiiasy salasynda birjalyq saýdany retke keltirý jáne jetildirý, sonda-aq básekeles saiasatty damytý boiynsha tapsyrma berilgen bolatyn. Máselen, biylǵy naýryz aiynan bastap benzin men bitýmdy taýar birjalary arqyly ótkizý josparlanǵan, bul rette ótkizý kólemi «Munai ónimderiniń jekelegen túrlerin óndirýdi jáne olardyń ainalymyn memlekettik retteý týraly» QR Zańynyń aiasynda Ministrlik bekitetin ai saiynǵy jetkizý josparlaryna sáikes anyqtalatyn bolady. Dizel otyny men kerosindi taýar birjalary arqyly ótkizýdi 2021 jyldyń 3-shi toqsanynda bastaý josparlanýda», - dedi ministr.
Sonymen qatar, Memleket basshysynyń 2019 jylǵy 5 qyrkúiektegi «Qazaqstan Respýblikasynyń munai-gaz salasyn damytý máseleleri týraly» hattamalyq tapsyrmasynyń aiasynda biylǵy jyly ónimdiligi jylyna 6 mln tonnaǵa deiin bolatyn «Keńqiiaq-Atyraý» munai qubyry reversiniń qurylysyn aiaqtaý josparlanyp otyr. Atalǵan jobany iske asyrý Pavlodar jáne Shymkent munai óńdeý zaýyttaryn batys qazaqstandyq (Atyraý, Mańǵystaý oblystary) munaimen júkteýge múmkindik týǵyzyp, Qyzylorda oblysynyń munai óndirýshi kompaniialary úshin ishki naryqqa munai jetkizýdegi júktemeni tómendetedi, sondai-aq ishki naryq pen eksporttyq jetkizilimder arasyndaǵy teńgerimsizdikti joiady.
