Foto: qaj.kz
Ulytaý oblysynyń ákimi Berik Ábdiǵaliuly biyl Qyzylorda-Jezqazǵan jolyn jóndeýge bólingen 90 milliard teńge jobany tolyq aiaqtaýǵa jetpei qalǵanyn aitty, - dep habarlaidy Massaget.kz portaly.
"Taǵy bir úlken problemanyń biri - joldar. Ásirese, Qyzylorda men Jezqazǵan arasyndaǵy jol. Qyzylorda jaǵy joldy aiaqtap jatyr. Biraq biyl Jezqazǵan bóliginde baǵa kóterilýine bailanysty jumys toqtatyldy. Sebebi 90 milliard teńge jetpei qaldy. Qazir Úkimet Aziia damý bankimen birigip, jobany 145 milliard teńgege kóbeitti. Endigi jylǵa sonyń 50 millirad teńgesi bólinip, konkýrs ótip jatyr", - dedi Berik Ábdiǵaliuly Ortalyq kommýnikatsiia qyzmetinde ótken baspasóz máslihatynda.
Onyń aitýynsha, Aziia damý banki konkýrsty jeltoqsanda aiaqtaýy kerek.
"2024 jyly 8 ýchaskede jol jóndeý jumystary bastalady", - dedi oblys ákimi.
Sondai-aq, biyl Qaraǵandy-Jezqazǵan jolyn jóndeý boiynsha konkýrs uiymdastyrylypty. Oǵan 2024 jylǵa 20 milliard teńge bólinedi eken.
"Arqalyq pen Ulytaýdyń arasy - 200 shaqyrym jol joq. Biyl sonyń 13 shaqyrymy "QazAvtoJol" kompaniiasynyń qoldaýymen jóndeldi. 2024 jyly taǵy 37 shaqyrym jolǵa, jalpy 40 shaqyrym jolǵa asfalt tóseimiz. Onda múldem asfalt joq. Bul erteń Arqalyq pen Jezqazǵan qalalarynyń damýyna septigin tigizedi", - dedi Berik Ábdiǵaliuly.
