Ulttyq biryńǵai testileýden 137 ball jinaǵan qaraǵandylyq mektep túlegi Ádilsamat Ábitaev qurdastaryna jetistiginiń syrymen bólisip, UBT-ny elektrondy formatta tapsyrýdyń artyqshylyǵyn aitty, dep habarlaidy QazAqparat.
«Ulttyq biryńǵai testileý – árbir túlektiń ómirindegi mańyzdy qadam. Degenmen, negizgi maqsat – UBT-ny jaqsy tapsyrý ǵana emes, bastysy – ómirde óz ornyńdy taýyp, tabysty tulǵa bolý. UBT-nyń barlyq suraǵy mektep baǵdarlamasy boiynsha daiyndalǵan. Kóptegen test suraqtaryna ońai jaýap berýge bolady. Aýditoriiada sizdi alańdatyp, kómek suraityn balalardyń bolýy da ábden múmkin. Olarǵa aitar basty keńesim: adam balasy qandai jaǵdai bolmasyn, tek óz kúshine ǵana senýi tiis», – deidi Qaraǵandy qalasyndaǵy №61 jalpy bilim beretin mekteptiń túlegi Ádilsamat Ábitaev.
Sonymen qatar ol UBT-ny elektrondy formatta tapsyrýdyń artyqshylyqtaryna da toqtalyp ótti.
«Talapkerler úshin testileý aiaqtalǵanǵa deiin jaýaptaryn ózgertip, aldyńǵy suraqtarǵa oralý múmkindigi bar. Eger buryn test tapsyrýshylar jaýap paraqtaryn boiaýǵa kóp ýaqyt jumsasa, qazir olai emes. Buryn skanermen tekserý kezinde durys toltyrylmaǵan jaýap nusqalarynyń eseptelmei qalýy siiaqty jaǵdailar oryn alatyn. Elektrondyq formattyń arqasynda biz óz nátijelerimizdi UBT aiaqtalǵannan keiin birden bildik. Meniń keibir tanystarym testileý aiaqtalǵannan keiin birden apelliatsiiaǵa berdi. Bul olardyń ýaqytyn aitarlyqtai únemdedi. Eń bastysy – endi túlekter eki márte baqtaryn synai alady. Árine, bul jańalyqty biz úlken qýanyshpen qabyldadyq», – dedi ol.
