Premer-Ministr Baqytjan Saǵyntaevtyń tóraǵalyǵymen ótken Úkimet otyrysynda investitsiialar jáne damý ministri Jeńis Qasymbek «Nurly jer» turǵyn úi qurylysy baǵdarlamasyn júzege asyrý barysy týraly baiandady, dep habarlaidy "Ult aqparat".
Ministr atap ótkendei, 2017 jyldyń qorytyndysy boiynsha turǵyn úi qurylysyna 979,8 mlrd teńge investitsiia salyndy, bul ótken jylǵy deńgeiden 18% joǵary. Jeke investitsiialardyń úlesi 825,8 mlrd teńgeni nemese jalpy kólemniń 84,3%-yn qurady, memlekettik investitsiialar úlesi — 154 mlrd teńgeni nemese jalpy kólemniń 15,7%-yn qurady.
«11,2 mln m2 turǵyn úi paidalanýǵa berildi, bul ótken jylǵy deńgeiden 6,2% joǵary. «Nurly jer» baǵdarlamasynyń jyldyq josparyna turǵyn úidi jalpy engizý 111%-ǵa oryndaldy. Jalpy 100,8 myń turǵyn úi salyndy, onyń ishinde 75,8 myń úi nemese jalpy kólemniń 75% jeke sektor esebinen, 25 myń páter (jalpy kólemniń 25%) memlekettik investitsiialar esebinen turǵyzyldy», — dedi Jeńis Qasymbek.
Turǵyn úidi paidalanýǵa berý boiynsha Astana qalasy (2,4 mln m2) jáne Almaty qalasy (1,9 mln m2), Mańǵystaý (833 myń m2) jáne Aqtóbe (792,3 myń m2) oblystary jetekshi oryn alady. Batys Qazaqstan (42,4%), Ońtústik Qazaqstan (36,2%), Qostanai (35,9%) jáne Pavlodar (31,2%) oblystarynda turǵyn úi qurylysy kóleminiń aitarlyqtai ósim qarqyny baiqalady.
Óńirlerge turǵyn úi qurylysyna qajetti infraqurylymdy júrgizý úshin 77,3 mlrd teńge bólindi, onyń 99,5% nemese 76,9 mlrd teńgesi igerildi.
«Halyqtyń áleýmettik áljýaz toptary úshin satyp alý quqyǵynsyz arendalyq turǵyn úi salý» baǵyty boiynsha respýblikalyq biýdjetten jyl saiyn óńirler arasynda birkelki taratylatyn 25 mlrd teńge bólinedi. Osy baǵytta 2017 jyly óńirlerde satyp alý quqyǵynsyz (288,7 myń m2) arendalyq turǵyn úidiń 5 391 páteri salynyp bastady, onyń ishinde 2 620 páter paidalanýǵa berildi. Biyl Baǵdarlamanyń osy baǵyty boiynsha 184,5 myń m2 (3 507 páter) salý josparlanyp otyr.
«Jeke turǵyn úi qurylysyn damytý» baǵyty boiynsha 70 myńnan astam jer telimine injenerlik kommýnikatsiialar jetkizildi. Olardyń 54 myńy buǵan deiin berilgen, al 16 myńy — jańa. Pilottyq joba aiasynda alty óńirde 2017 – 2018 jyldary aiaqtalýy tiis 1 975 úidiń qurylysy bastalǵan. 2017 jyldyń qorytyndysy boiynsha 164 úi paidalanýǵa berildi, olardyń ishinde Aqtóbe oblysynda – 124, Qostanai oblysynda – 40 úi. Qalǵan úiler osy jyly paidalanýǵa beriledi.
Baǵdarlamanyń «Jergilikti atqarýshy organdardyń turǵyn úi qurylys jinaq júiesi úshin nesielik turǵyn úi salý» úshinshi baǵyty boiynsha JAO kredittik turǵyn úidiń 9 010 páterin paidalanýǵa bergen.
«Jeke qurylys salýshylardy turǵyn úi salýǵa yntalandyrý» baǵyty boiynsha ekinshi deńgeidegi bankter beretin nesieler boiynsha jyldyq syiaqy mólsherlemesiniń «Damý» KDQ» AQ 7% sýbsidiialaidy. Baǵdarlamanyń bul baǵyty 2017 jyldyń II toqsannan bastap iske asyrylyp jatyr. Qurylys salýshylardyń nesielerin sýbsidiialaý kórsetkishteri tolyq kólemde oryndaldy.
«Halyqqa arnalǵan ipotekalyq nesielendirýdiń qoljetimdiligin arttyrý» baǵyty boiynsha iske asyrýdyń basynan beri qaryz alýshylardan 14,2 mlrd teńgege sýbsidiialanǵan qaryz alýǵa 1 388 ótinish qabyldandy, sonyń ishinde 1 317 ótinish maquldandy.
«Memleket basshysynyń Joldaýyna sáikes 2030 jyly bir turǵynǵa shaqqanda turǵyn úimen qamtamasyz etý kórsetkishin 30 m2 deiin jetkizý qajet. Ol úshin qurylys kóleminiń jyl saiyn 8-10% deńgeide ósýin qamtamasyz etý kerek. Bul 2030 jyly turǵyn úidi paidalanýǵa berý deńgeiin 30 mln m2 deiin jetkizýge múmkindik beredi», — dedi J. Qasymbek.
Máseleni talqylaý barysynda QR Premer-Ministriniń birinshi orynbasary A. Mamin, «Báiterek» UBH tóraǵasy A. Áriphanov, Qaraǵandy oblysynyń ákimi E. Qoshanov, Aqmola oblysynyń ákimi M. Myrzalin, Atyraý oblysynyń ákimi N. Noǵaev, Mańǵystaý oblysynyń ákimi E. Toǵjanov, Batys Qazaqstan oblysynyń ákimi A. Kólginov, Ońtústik Qazaqstan oblysynyń ákimi J. Túimebaev sóz sóiledi.
