Táýelsizdik merekesine arnalǵan keshte ekonomikalyq kórsetkishterge toqtalǵan óńir basshysy Janseiit Túimebaev aldaǵy ýaqytta da zaman talabyna sai áleýmettik nysandar kóbeietinin jetkizdi. Bul týraly Túrkistan oblysy ákiminiń baspasóz qyzmeti habarlaidy.
«2018 jyly 80 bilim nysanynyń qurylysyna memlekettik biýdjetten 17,5 mlrd teńge bólinip, 30 mektep jəne 3 kolledj el igiligine tapsyryldy. Nətijesinde 5 apatty jəne 3 úsh aýysymdy mekteptiń məselesi sheshildi. Jyl sońyna deiin qosymsha 6 mekteptiń qurylysyn tapsyrý josparlanýda. Biyl óńirde 94 jekemenshik balabaqsha, memlekettik-jekemenshik-áriptestik aiasynda 3 balabaqsha jáne 1 memlekettik balabaqsha tapsyryldy. Balabaqshamen qamtý kórsetkishi boiynsha oblysymyz kóshbasshylar qatarynda. Balalardy mektepke deiingi tárbiemen qamtý kórsetkishi 93 paiyzdan asty. Meditsina salasyna kelsek, biyl Kentaý, Sairam, Saryaǵash aýdandarynda 3 insýlttik ortalyq ashylyp, 3 dana kompiýterlik tomograf ornatyldy. 62 dárigerlik bekettiń qurylysyn júrgizý josparlanyp, el igiligine berildi. Aldaǵy ýaqytta da bul baǵytta jumys báseńdemeidi», - degen óńir basshysy munyń bári Táýelsizdiktiń jemisi ekenin aitty.
Búginde Túrkistan oblysynda 125 myńǵa jýyq shaǵyn jáne orta kásipkerlik qurylymdardyń jumys istep tur. Osy salada 186 myńnan astam adam jumyspen qamtylyp, olar shyǵarǵan ónim kólemi 130,9 mlrd. teńgege jetken. Oblysta 2018 jyldyń 1 qarashasyna deiin 25 136 jańa jumys orny ashylǵan. Sonymen birge, «Eńbek» nátijeli jumyspen qamtýdy jáne jappai kásipkerlikti damytýdyń 2017-2021 jyldarǵa arnalǵan» baǵdarlamasy aiasynda 65 myń adamdy jumyspen qamtý sharalaryna qatystyrý josparlanyp, júzege asýda. Jappai kásipkerlikti damytý boiynsha «Bastaý-Biznes» jobasy aiasynda 1730 adam oqýǵa joldanyp, tiisti sertifikattaryn alǵan. «Aýyl – el besigi» arnaiy jobasy aiasyndaǵy «Ár aýylǵa óz sheberi» bastamasy boiynsha oblystyń 123 eldi mekeninen 2588 adam arnaiy oqýdan ótip, jumysqa aralasqan.
«Prezidentimiz biylǵy Joldaýynda eldiń ál-aýqatyn jaqsartyp, kásipkerlikti damytý jóninde tyń mindet júktedi. Elbasymyzdyń «Túrkistan» erkin ekonomikalyq aimaǵyn qurý týraly Jarlyǵy da Túrkistannyń damýyna tyń serpin beredi. Osy oraida 1380 ga aýmaqta ornalasqan ekonomikalyq aimaqta óndiris oryndary ashylyp, jańa jumys oryndary paida bolady», - deidi Janseiit Túimebaev.
