Túrkistan oblysynda biyl 350,1 myń sharshy metr turǵyn úi, iaǵni 2680 páter paidalanýǵa berildi. Bul ótken jyldyń osy kezeńimen salystyrǵanda 21,1%-ǵa artyq, dep habarlaidy "Ult aqparat" QazAqparat agenttigine silteme jasap.
Búginde óńirde 79 kópqabatty turǵyn úidiń qurylysy júrip jatyr. Jyl sońyna deiin onyń 500 páteri, iaǵni 35 turǵyn úi paidalanýǵa beriledi.
Oblystyq qurylys basqarmasynyń basshysy Toqtar Ýsýbalievtiń málimetinshe, óńirde satyp alý quqyǵynsyz arendalyq turǵyn úi qoryn qurý boiynsha aǵymdaǵy jyly memlekettik biýdjet esebinen 2449 páterli úilerdiń qurylysy júrip jatyr. Budan ózge, injenerlik kommýnikatsiialardy jetkizý boiynsha memlekettik biýdjet esebinen 15 nysan salynýda. Biylǵy 10 aidyń qorytyndysy boiynsha jyldyq jospar tolyǵymen oryndalyp, 350,1 myń sharshy metr turǵyn úi paidalanýǵa berildi.
Óńirde 2018 jyldyń jospary - 140,8 mlrd teńge bolyp belgilengen. Jospar 97,3 mlrd teńgege oryndalyp, ótken jylmen salystyrǵanda 102,6%-dy qurady. Osyndai júieli jumystardyń nátijesinde óńirdegi qala-aýdandarda páter kezeginde turǵan azamattar arendalyq baspanamen qamtylyp otyr.
Máselen, Arys qalasyndaǵy «Kóktem-2» shaǵynaýdanynda 36 páterli úsh birdei kópqabatty úi turǵyzyldy. Qazirgi tańda bul úilerdiń qurylys jumystary jospar boiynsha tolyǵymen aiaqtalyp, qabyldanǵan. Aita ketý kerek, Arystaǵy naq osy turǵyn aýdanda, munan bólek, taǵy 36 páterli kópqabatty úsh úi salynyp jatyr. Al qala boiynsha 1397 azamat úi kezeginde tur. Saryaǵash aýdanynda ótken jyly 19,9 myń sharshy metr turǵyn úi tapsyrylǵan. Aǵymdaǵy jyldyń 10 aiynda «Nurly jer» baǵdarlamasy boiynsha 24 myń sharshy metr turǵyn úi el igiligine berildi. Qaplanbek oqý-tájiribe sharýashylyǵy aýmaǵynda «Nurly jer» baǵdarlamasymen bes qabatty, 585 páterli 13 úidi alty qurylys mekemeleri salýda. Jalpy smetalyq quny 5,3 mlrd teńgeni quraityn 13 úi keler jyly tolyq paidalanýǵa beriledi.
Oblys ortalyǵy Túrkistan qalasyndaǵy «Otyrar» móltekaýdanynda memlekettik qarjy esebinen 11 kópqabatty turǵyn úi turǵyzylyp jatyr. Budan basqa arendalyq bes qabatty 60 páterli 9 turǵyn úidiń qurylysyna memlekettik satyp alý konkýrsy ótkizilýde.
