Túrkistan oblysy ákimdiginde óńirdi aýyz sýmen qamtý jumystary, osy saladaǵy ózekti túitkilder talqylandy, dep habarlaidy «Ult aqparat» oblys ákimdiginiń baspasóz qyzmetine silteme jasap.
Oblys ákiminiń tóraǵalyǵymen ótken májiliste osy sala boiynsha ár aýdan, qala ákimdikterindegi kemshilikter aitylyp, barlyq joba men jospar keńinen taldandy.
«Biz úshin óńirdi damytýdaǵy eń birinshi basymdyq – eldi sapaly aýyz sýmen qamtý. Taza aýyz sý – ult densaýlyǵyn saqtaýdyń kepili. Sondyqtan osy saladaǵy máseleler tereń taldanyp, tiisti usynystar aitylsyn. Memleket tarapynan qarjylandyrylyp jatqan árbir joba qatań baqylanyp, qadaǵalaý júrgizilýi kerek», – dedi Darhan Satybaldy.
Túrkistan oblysy ákiminiń birinshi orynbasary Arman Jetpisbai aimaqty aýyz sýmen qamtý baǵytyndaǵy jumystardy baiandady. Onyń málimdeýinshe, Túrkistan oblysynda 2022 jyldyń 1 qarashasyndaǵy jaǵdai boiynsha 831 eldi mekenniń 712-si (7 qala, 705 aýyldyq eldi meken) nemese 85,7 % aýyz sýmen qamtamasyz etilgen. Oblys kóleminde aýyz sý berý qyzmetimen ainalysatyn 32 kásiporyn bar.
2022 jyly 55 nysannyń qurylys jumystaryna biýdjet esebinen 18,3 mlrd. teńge bólindi. Sonyń ishinde 13 nysandy biyl tapsyryp, paidalanýǵa berý josparlanýda. Qalǵan 42 nysannyń qurylysy 2023 jylǵa ótpeli. Jyl qorytyndysymen sý qubyry múldem joq 11 eldi meken (Saryaǵash-3, Qazyǵurt-2, Ordabasy-6) aýyz sýmen qamtamasyz etiledi, 4 eldi mekenniń (Jetisai-2, Ordabasy-1, Túlkibas-1) tozyǵy jetken sý qubyrlary qaita jańartylady.
Biyl Jetisai, Saryaǵash, Maqtaral, Qazyǵurt, Keles aýdanyndaǵy qurylysy júrgizilip jatqan nysandardyń barysyna basqarma mamandarymen arnaiy zerdeleý jumystary júrgizildi. Anyqtalǵan kemshilikter baqylaýǵa alynǵan.
Atalǵan máseleni sheshý maqsatynda, «Túrkistan oblysy boiynsha aýyz sýmen qamtamasyz etýdiń 2022-2025 jyldarǵa arnalǵan is-shara jospary» bekitildi. Josparda kórsetilgen merzimderge sáikes, tozyǵy jetken sý qubyrlary kezeń-kezeńimen qaita jańartylady.
Jiyndy túiindegen oblys ákimi jaýapty basqarmalar men aýdan, qala ákimderine aýyz sý máselesin nazarda ustaý, aýyz sýdyń jer asty qorlaryn barlaý, jobalyq-smetalyq qujattar men sý nysandarynyń qurylysyn sapaly atqarý jóninde tapsyrma berdi.
