2021 jyly halyqqa meditsinalyq kómek kórsetýge 1,8 trln teńge baǵyttalady. Bul týraly Áleýmettik meditsinalyq saqtandyrý qorynyń basqarma tóraǵasy Bolat Tókejanov aitty, dep habarlaidy QazAqparat.
«2021 jylǵa arnalǵan satyp alý jospary boiynsha halyqqa meditsinalyq kómek kórsetýge – 1,8 trln teńge, onyń ishinde tegin meditsinalyq kómektiń kepildik berilgen kólemine – 1,1 trln teńge, mindetti áleýmettik meditsinalyq saqtandyrýǵa 700 mlrd teńge qarastyrylǵan», - dedi Bolat Tókejanov Ortalyq kommýnikatsiialar qyzmetinde ótken brifingide.
Bul qarajatty qor 1 363 meditsinalyq mekemeniń kómegimen igermekshi.
«1 sáýirdegi jaǵdai boiynsha, 1,46 trln teńge somasyna 1 363 meditsinalyq qyzmet jetkizýshimen shart jasaldy. Halyqqa meditsinalyq qyzmet kórsetý úshin tartylatyn jekemenshik jetkizýshilerdiń ósý úrdisi saqtalýda. Eger ótken jyly Qormen 635 jeke jetkizýshi jumys istese, biyl olardyń sany 688 deiin ósti», - dedi qordyń basqarma tóraǵasy.
Onyń aitýynsha, óńirler arasynda jekemenshik jetkizýshilerdiń eń joǵary úlesi Shymkent, Nur-Sultan jáne Almaty qalalaryna tiesili. Al aýyldy eldi mekenderde meditsinalyq qyzmettiń sapasyn jyljymaly meditsinalyq keshenderdi kóbeitý arqyly kóterý kózdelip otyr.
«Aýyldyq jerlerde meditsinalyq qyzmetterdiń qoljetimdiligin arttyrý úshin ótken jyly 100 jyljymaly meditsinalyq keshen satyp alyndy, biylǵy jyly barlyq aýyl turǵyndaryna 149 JMK qyzmet kórsetedi, olardyń ishinde beiindi mamandardyń konsýltatsiialaryn alýǵa, skriningterdi qosa alǵanda, diagnostikadan ótýge, zerthanalyq taldaýlar tapsyrýǵa, vaktsinatsiia jasaýǵa, aýrýhanaǵa jatqyzýǵa joldama alýǵa jáne meditsinalyq kómektiń birqatar basqa da túrlerin alýǵa bolady. Birinshi toqsanda «jyljymaly emhanalar» dep atalatyn mobildi meditsinalyq keshender arqyly aýyl turǵyndaryna 231,9 mln teńgege 120 myń meditsinalyq qyzmet kórsetildi», - dedi Bolat Tókejanov.
