Aýyl sharýashylyǵy vitse-ministri Rústem Qurmanov Soltústik Qazaqstan men Aqmola oblystaryndaǵy paidalanylmai jatqan jerge ǵarysh arqyly júrgizilgen aýdittiń qorytyndysyn jariialady, dep habarlaidy QazAqparat.
«Memleket basshysynyń tapsyrmasyna sáikes aýyl sharýashylyǵy jerlerine aýdit júrgizilip, jer kadastryn tsifrlandyrý jumysy qolǵa alyndy. 2019 jyldyń ekinshi jartysynda «QazǴaryshSapary» AQ-pen birge pilottyq rejimde geoportal quryldy. Onyń kómegimen ǵaryshtan túsirilgen sýretter arqyly Aqmola jáne Soltústik Qazaqstan oblystaryndaǵy aýyl sharýashylyǵy jerlerine onlain túrde monitoring jasalyp, qaitadan sanaq jumystary bastalǵan edi», - dedi Rústem Qurmanov aýyl sharýashylyǵy ministrliginiń alqa májilisinde.
Osy jumystardyń arqasynda 2019 jyly Aqmola oblysynda paidalanylmai jatqan 289,2 myń ga, esepke tirkelmegen jáne ózdiginen alyp alǵan 133,6 myń ga jerdiń bary anyqtalǵan. Al Soltústik Qazaqstanda dál osyndai paidalanylmai jatqan 284,3 myń ga jáne esepke tirkelmegen nemese ózdiginen alyp alǵan 88,7 myń ga jerdiń bary belgili bolǵan.
«Esepke alynbaǵan ýchaskeler boiynsha ákimdikter habarlandyrý jibere otyryp, resimdeý jumystaryn júrgizip jatyr. Al ózdiginen alyp alǵan jáne paidalanylmai jatqan jer aýmaqtary boiynsha materialdar sotqa joldanady. Biyl osy aýdit basqa óńirler boiynsha jalǵasady», - dedi ol.
