Foto: © Sputnik / Abzal Kaliev
2022 jylǵy 1 qyrkúiekten bastap Memleket basshysynyń tapsyrmasy boiynsha qazaqstandyq joǵary oqý oryndary stýdentteriniń stipendiiasy 20%-ǵa, magistranttar men doktoranttardyń stipendiiasy 15%-ǵa ósedi, dep habarlaidy "Ult aqparat" BǴM baspasóz qyzmetine silteme jasap.
Esterińizge sala keteiik, 2021 jyldyń qyrkúiek aiynda bakalavrlar stipendiiasynyń mólsheri 20%-ǵa, magistranttar men doktoranttar stipendiiasynyń mólsheri 15%-ǵa artty. Osylaisha, 2021 jyldyń qyrkúieginen bastap stýdentterdiń shákirtaqysy 31 423 teńgeni, magistranttardiki – 76 950 teńgeni, doktoranttardiki – 172 500 teńgeni qurady.
«Osy jyldyń qyrkúiek aiynan bastap stýdentterdiń stipendiiasy taǵy da 20%-ǵa ósedi. Mysaly, pedagogika mamandaryn daiarlaý baǵyty boiynsha oqityn stýdentter 58 myń teńgeden astam, basqa baǵyttar boiynsha bilim alatyndar 37 myń teńgege jýyq shákirtaqy ala bastaidy. Magistranttardyń shákirtaqysy 86 987 teńgege deiin, doktoranttardyń shákirtaqysy 195 000 teńgege deiin ósedi», – dedi QR BǴM Joǵary jáne joǵary oqý ornynan keiingi bilim departamentiniń direktory Ádilet Toibaev.
