Biyl elimizde orman órtterinen kelgen shyǵyn kólemi 560 mln teńgeden asyp jyǵyldy. Bul týraly QR Ekologiia, geologiia jáne tabiǵi resýrstar ministrligi Orman sharýashylyǵy jáne janýarlar álemi komitetiniń baspasóz hatshysy Sáken Dildahmet Facebook-tegi paraqshasynda jazdy, dep habarlaidy "Ult aqparat".
Onyń atap ótýinshe, 2019 jyly memlekettik orman qory aýmaǵynda 73 515,61 gektardy sharpyǵan 628 orman órti tirkelgen. Kelgen shyǵyn 563,5 mln teńgeni quraidy. Eń iri órt Jambyl (40,9 myń gektar), Túrkistan (24 myń), Qaraǵandy (2,7 myń), Pavlodar (2,3 myń) oblystarynyń orman jáne tabiǵatty qorǵaý mekemeleriniń aýmaqtarynda bolǵan.
«Ministrik (QR Ekologiia, geologiia jáne tabiǵi resýrstar ministrligi) oryn alǵan iri orman órtteri boiynsha qyzmettik tekserý júrgizdi. Tekserý qorytyndysy órtterdiń taralýynyń negizgi sebebi dala órtteriniń memlekettik orman qorlary jerine ótýi, orman kúzetiniń tehnikamen jáne quraldarmen álsiz jaraqtandyrylýy ekendigin kórsetti. Ótken jylmen salystyrǵanda orman órtteriniń sany 1,7 esege (358-den 628-ge deiin), orman órtteriniń aýdany 2,2 esege (162,6 myń gektardan 73,5 myń gektarǵa deiin) qysqardy», - dep atap ótedi ol.
Sáken Dildahmettiń aitýynsha, biyl oblystyq ákimdikterdiń orman sharýashylyǵy qurylymdyq bólimsheleriniń, orman sharýashylyǵy memlekettik mekemeleri men tabiǵatty qorǵaý mekemeleriniń qatysýymen órt qaýpi joǵary maýsymǵa daiyndyq júrgizilgen. Orman órtine qarsy kúrestegi ózara is-qimyl jospary ázirlenip, tehnikalar, quraldar, baqylaý nysandary jóndelgen. 452,5 tonna benzin, 508,6 tonna dizel otyny daiyndalǵan.
«Shaǵyn aýdanda orman órtterin der ýaqytynda anyqtaý jáne joiý maqsatynda respýblikanyń 8 oblysynda (Almaty, Aqmola, Shyǵys Qazaqstan, Jambyl, Qaraǵandy, Soltústik Qazaqstan, Qostanai jáne Pavlodar oblystary) 8 mln 869 myń gektarǵa nemese memlekettik orman qorynyń 30 paiyz aýmaǵyna aviasholǵyndaý júzege asyryldy», - dedi komitettiń baspasóz hatshysy.
