Biyl óndiristik jaraqat saldarynan 59 adam qaza tapty. Bul týraly Eńbek, áleýmettik qorǵaý jáne kóshi-qon komiteti tóraǵasynyń orynbasary – QR Bas memlekettik eńbek inspektory Tólegen Ospanqulov aitty, dep habarlaidy QazAqparat.
«2020 jyly respýblika kásiporyndarynda oryn alǵan qaiǵyly oqiǵalardan 1 503 adam zardap shekti. Qaza tapqandardyń sany 15,5 paiyzǵa artyp, 208 adamǵa jetti. 2019 jyly 180 adam qaza tapqan edi», - dedi Tólegen Ospanqulov Ortalyq kommýnikatsiialar qyzmetindegi baspasóz máslihaty barysynda.
Onyń atap ótýinshe, Qaraǵandy, Shyǵys Qazaqstan jáne Qostanai, Pavlodar oblystaryndaǵy taý-ken metallýrgiialyq keshen kásiporyndarynda jaraqattaný deńgeii joǵary bolyp otyr. Ótken jyly bul salada 304, al qurylys salasynda 175 adam jaraqattanǵan.
«Osy jyldyń 4 aiynda ǵana elimizdiń kásiporyndarynda 462 adam zardap shegip, onyń 59-y qaza tapty. Bul 2020 jyldyń 4 aiymen salystyrǵanda 11 paiyzǵa joǵary», - dedi Bas memlekettik eńbek inspektory.
