Biyl elektrondy túrde kórsetiletin memlekettik qyzmetter kólemin 90 paiyzǵa jetkizý kerek. Bul týraly Úkimet otyrysynda QR Tsifrlyq damý, innovatsiialar jáne aeroǵarysh ónerkásibi ministri Baǵdat Mýsin aitty, dep habarlaidy QazAqparat.
«Jyldan jylǵa elektrondy túrde kórsetiletin qyzmetter sany ulǵaiýda. Qazirgi tańda memlekettik tizilimde 700-ge jýyq qyzmet bar. Olardyń 85,5 paiyzy onlain túrde kórsetiledi. Bizdiń maqsatymyz - biyl osy kórsetkishti 90 paiyzǵa deiin jetkizý», - dedi ol.
Onyń atap ótýinshe, memlekettik organdardyń ishinde memlekettik qyzmetterdi elektrondy túrge kóshirý barysynda tiisti kórsetkishke jete almai otyrǵandary bar.
«Osy jumysty ýaqytyly aiaqtaý qajet. Kórsetiletin qyzmetter sapasyn baqylaý Memlekettik qyzmet ister agenttiginiń quziretinde. Olar júrgizgen qoǵamdyq monitoring nátijesin qarasaq, elimizdiń aýmaqtarynda halyqtyń memlekettik qyzmettermen qanaǵattaný deńgeiin kóterý qajet ekendigi aiqyn. Ol úshin aldymyzǵa qoiylatyn birqatar ashyq másele bar. Mysaly, memlekettik qyzmetti alý úshin halyq áli de tikelei memlekettik organǵa nemese ákimdikke júginedi. Osyndai qyzmetter sany - 200-den astam», - dedi ministr.
Baǵdat Mýsin máseleni taldaý úshin Bas prokýratýramen birlesip, halyqtan kelip túsken ótinishterdi zerttegenderin aitady.
«Nátijesinde 2 mln-nan astam ótinishterdiń 30 paiyzy memlekettik qyzmetke ekeni anyqtaldy. Osyndai jaǵdaida Halyqqa qyzmet kórsetý ortalyqtaryna qaraǵanda merzimderi buzylýy múmkin. Óitkeni, baqylaýǵa arnalǵan aqparattyq júiege kirmeidi jáne jeke qarym-qatynas kezinde sybailas jemqorlyq bolýy múmkin. Bul máseleni sheshý maqsatynda barlyq qyzmetterdi balamasyz tek HQKO-larda nemese elektrondy túrde kórsetý qajet», - dedi ol.
