2022 jyly qazaqstandyq JOO-larda oqýǵa arnalǵan bilim granttarynyń sany taǵy 5 myńǵa artady. Osylaisha, granttardyń jalpy sany 61 myńǵa deiin jetedi, dep habarlaidy "Ult aqparat" Bilim jáne ǵylym ministrliginiń baspasóz qyzmetine silteme jasap.
Esterińizge sala keteiik, 2021 jyly kadrlardy daiarlaýǵa arnalǵan memlekettik bilim berý tapsyrysy 5 myńǵa, iaǵni 51 myńnan 56 myń grantqa deiin kóbeitilgen. Jańa granttar stýdentter arasynda suranysqa ie jáne ózekti mamandyqtarǵa bólinetin bolady.
Jalpy, Memleket basshysynyń tapsyrmasy boiynsha joǵary bilimniń qoljetimdiligin arttyrý úshin 2025 jylǵa deiin bilim berý granttarynyń sany kezeń-kezeńimen taǵy da 15 myńǵa artady.
Sondai-aq bilim berý granttaryn bólý kezinde azamattardyń áleýmettik osal sanattary úshin kvotalar kózdelgen.
«Osylaisha, Prezidenttiń qoldaýynyń arqasynda biýdjet esebinen oqýǵa múmkindik alǵan qazaqstandyq mektep túlekteriniń sany artty. Mysaly, ótken jyly bizge 75 myńnan astam ótinim tústi. Onyń ishinde 56 myńnan astam talapker grant aldy. Biyl granttar sany 61 myńǵa jetedi. Memleket basshysynyń tapsyrmasy boiynsha halyqtyń áleýmettik osal toptarynan shyqqan balalar úshin kvotalar sanyn ulǵaittyq. Iaǵni, kópbalaly nemese tolyq emes otbasylardan shyqqan balalar, sondai-aq otbasylarynda erekshe qajettilikteri bar balalardy tárbielep otyrǵan otbasynan shyqqan talapkerler grant alý úshin áldeqaida kóp múmkindikterge ie bolady», – dep habarlady Bilim jáne ǵylym vitse-ministri Qýanysh Erǵaliev.
