QR Qarjy ministrligi Memlekettik kirister komiteti memlekettik qyzmetter departamenti memlettik qyzmetter basqarmasynyń basshysy Vladlen Balan mobildi aýdarymdardy baqylaý týraly kúshine engen buiryqtyń mánin túsindirdi, dep habarlaidy QazAqparat.
Mamannyń aitýynsha, kásipkerlik qyzmetpen ainalyspaityn qarapaiym qazaqstandyqtarǵa bul ózgeris eshqandai áser etpeidi.
«Birinshi kezeńde 2022 jyldyń qorytyndysy boiynsha bul ólshemder memlekettik qyzmetshiler men olarǵa teńestirilgenderge, solardyń jubailaryna qatysty bolady. Iaǵni, 2022 jyldyń qorytyndysy boiynsha jańaǵy sanattarǵa kiretin naqty tulǵalardyń tizimi qalyptasady. Bul tizim ekinshi deńgeili bankterge joldanady. Ekinshi deńgeili bankter ázirlengen ólshemsharttar boiynsha álgi tizimdegi tulǵalardy búgin kúshine engen zańnyń talaby boiynsha tekserip shyǵady. Tizimdegi tulǵalardyń derekteri osy ólshemsharttarǵa sáikes kelse, memlekettik kirister organyna qaita jiberiledi. Biz bankterdiń bergen deregi boiynsha jumys isteimiz. Bul memlekettik kiris organdary jeke tulǵalardyń shottaryn jappai baqylaýǵa alady degen sóz emes. Baqylaý tek bankterdiń tekserýi kezinde anyqtalǵan buzýshylyqtar boiynsha ǵana júrgiziledi», - dedi basqarma basshysy.
Aitýynsha, bul jerdegi ólshemshart degen uǵym jeke tulǵalardyń bank shotyna bir aidyń ishinde basqa 100-den astam jeke tulǵadan mobildi aqsha aýdarymdary túsýin bildiredi.
«Úsh ai boiy meniń bank shotyma mobildi aýdarym arqyly ai saiyn 100-den artyq jeke tulǵanyń shotynan aqsha tústi deiik. Mundai jaitty biz kásipkerlikpen kásipker retinde tirkelmei ainalysý táýekeli retinde qaraimyz. Al jeke kásipker retinde tirkelgen bolsańyz, onyń tabysyn jeke tulǵa retinde ashylǵan shotqa qabyldai almaisyz. Jeke kásipker retinde ashqan shotyńyzǵa ǵana tólem qabyldaýyńyz kerek», - dep túsindirdi Vladlen Balan.
Komitet ókili búginnen bastap búkil qazaqstandyqtardyń shotyn bankterge teksertkeli jatpaǵanyn basa aitty.
«Jyl saiyn tizim jasap, jiberip otyramyz. Tiisinshe, ákimshilendirý nátijesine súiene otyryp, ólshemder pysyqtalady. Joǵaryda aitqan ólshemsharttar barynsha keń etip alyndy. Bul ólshemsharttardy ekinshi deńgeidegi banktermen aqyldasyp bekittik. Bastapqyda jeke tulǵanyń bank shotyna ai saiyn aqsha aýdarǵan ártúrli tulǵalardyń sanyn 50-ge deiin qysqartaiyq degen másele týyndaǵan. Keiin 100 degen ólshemge toqtadyq. Óitkeni halyqtyń túgelge jýyǵy Kaspi qosymshasy arqyly aýdarym jasap júr. Týystar, jaqyn dostar men otbasy músheleri arasyndaǵy aýdarym ólshemshartqa enip ketpeýi úshin 100-ge keńeittik», - deidi memlekettik kirister komitetiniń basqarma basshysy.
Sondai-aq, ol biyl nege memlekettik qyzmetshiler men olarǵa teńestirilgender, olardyń jubailarynyń shottary ǵana mobildi aýdarymdar boiynsha tekseriletinin túsindirdi.
«Jyl saiyn tizim jasap otyramyz dedim ǵoi. Mysaly osy jyldyń qorytyndysy boiynsha memlekettik qyzmetkerler men solarǵa teńestirilgenderdiń, jubailarynyń tizimin ekinshi deńgeili bankterge jiberemiz. Ekinshi kezeńde, iaǵni, 2023 jyly kvazimemlekettik sektor qyzmetkerleri men biýdjettik sala qyzmetkerleriniń, olardyń jubailarynyń tizimin jiberemiz. Odan keiin, iaǵni, 2024 jyly kásipkerler men zańdy tulǵalardyń basshylary men quryltaishylarynyń, olardyń jubailarynyń tizimin jiberip teksertemiz. Osydan keiin baryp qana, iaǵni, 2025 jyly bankter búkil jeke tulǵalardyń bank shottaryn zerdeleidi. Bul kezeńge jetkenge deiin tájiribe barysynda ólshemsharttardy jetildire túsemiz. Sol arqyly ólshemsharttarǵa ádiletsiz enýi táýekelderin azaitamyz», - dedi Vladlen Balan.
Qarapaiym tilmen aitsaq, Qarjy ministriniń mobildi aýdarymdarǵa qatysty buiryǵy búginnen bastap búkil qazaqstandyqtardyń jeke tulǵa retinde ashqan shottaryn baqylaýǵa almaidy.
Qandai sanatqa jatatynyna qaramastan búkil tulǵalardyń bank shotyna jasalatyn aýdarymdardy baqylaý tek 2025 jyly bastalady.
«Mysaly, búginnen bastap kásipker retinde tirkelmese de, jolaýshy tasymaldap júrgen jeke tulǵa memlekettik qyzmetshi bolmasa, biyl onyń shoty tekserilmeidi. Jalpaq tilmen aitqanda, ondai adamnyń 2025 jylǵa deiin osylai tabys taba turýyna múmkindik bar. Biraq mobildi aýdarym jasaýǵa arnalǵan QR-tardy paidalanǵan durys», - dedi Memlekettik kirister komitetiniń basqarma basshysy.
