QR Ishki ister vitse-ministri Iýrii Ilin aldaǵy qys mezgiline aýa raiy boljamymen bólisti, dep habarlaidy QazAqparat tilshisi.
Onyń aitýynsha, biyl aýa temperatýrasy ótken jyldarmen salystyrǵanda normadan 1-2 gradýs tómen bolady.
«Aýa raiy boljamy Qazgidrometpen birlese jasalady. Jaýyn-shashyn mólsheri de elimizdiń basym aýmaǵynda qalypty mólsherde túsedi. Tek qystyń sońǵy aiy men naýryz aiynda jaýyn-shashyn kóbeiedi degen boljam bar. Sáikesinshe, kóktemgi kezeńge óte tyńǵylyqty daiyndalý qajet», - dedi Iu. Ilin Ortalyq kommýnikatsiialar qyzmetinde ótken baspasóz máslihatynda.
Vitse-ministrdiń aitýynsha, aldaǵy qys mezgilinde adamdardyń qaza bolýyna jol bermeýge jáne qysqy kezeńdegi TJ-dan keletin zalaldy barynsha azaitýǵa baǵyttalǵan is-sharalar anyqtaldy. «Qys-2018» respýblikalyq komandalyq-shtabtyq oqý-jattyǵý aiasynda azamattyq qorǵaý memlekettik júiesiniń qysqy kezeńge daiyndyǵy pysyqtaldy.
«Daýyldy eskertý jariialanǵanda respýblikalyq jáne jergilikti mańyzy bar joldardaǵy qoǵamdyq jáne júk kólikteri toqtatylady. Bul turǵyda jergilikti politsiia qyzmetine barlyq jol toraptaryndaǵy jáne avtobeketterdegi qozǵalysty shekteý quzireti berilgen. Jol-paidalaný qyzmetteri 1 myńnan astam injenerlik jáne qar tazalaý tehnikasyn ázirledi. 120 myń tekshe metr kóktaiǵaqqa qarsy material, 12 myń tonnadan astam tuz daiyndaldy. 37 myń metrden astam qardan qorǵaityn qalqandardy ornatý júzege asyrylýda. Qoldanystaǵy 950 jylytý pýnktine qosymsha taǵy 130 beket jabdyqtaldy», - dedi Iu. Ilin.
