Jumys kúshi artyq óńirlerden qonys aýdarǵan 450 otbasy Soltústik Qazaqstan oblysynda jańa ómir bastady, dep habarlaidy "Ult aqparat" Eńbek jáne halyqty áleýmettik qorǵaý ministrligine silteme jasap.
Biylǵy 8 aida «Eńbek» memlekettik baǵdarlamasyn iske asyrý sheńberinde jalpy sany 1384 adamnan turatyn 452 otbasy Soltústik Qazaqstan oblysyna jumys kúshi artyq óńirlerden kóship keldi. Almaty, Jambyl jáne Túrkistan oblystarynan, sondai-aq respýblikalyq mańyzy bar qalalardan qonys aýdarýshylar jumys kúshi tapshy óńirden jańa qonys tapty.
Bir jyl buryn Gúlmira Jolaspaeva Nur-Sultan qalasynan SQO Ǵabit Músirepov aýdany Kovylnoe aýylyna kóship keldi jáne óz tańdaýyna esh ókinbeidi. Ol aýyl mektebinde aǵylshyn tili muǵalimi bolyp jumys isteidi. Kúieýi aýyl sharýashylyǵy uiymyna brigadir bolyp jumysqa ornalasty.
«Biz otbasymyzben uzaq ýaqyt jaldamaly páterlerde turyp júrdik. Al balalar bolsa er jetýde – olarǵa alańsyz oqý kerek. Turaqtylyq qajet. Sondyqtan biz qaladan kóshýge sheshim qabyldadyq. Bizge barlyq jaǵdai jasalǵan,jaqsy úi berildi. Qazir biz kúieýim ekeýmiz jumys isteimiz, balalar ekinshi jáne tórtinshi synyptarda oqidy», - deidi áiel.
Óńirde jańa jerdegi qyzmetine qyzyǵýshylyqpen kirisken basqa da adamdar bar. Máselen, kópbalaly otbasynyń otaǵasy Dúisembi Ospanov Túrkistan oblysynan Soltústik Qazaqstan oblysynyń Qyzyljar aýdanyna kóship kelgen soń «Eńbek» memlekettik baǵdarlamasy boiynsha grant alyp, oǵan iri qara mal satyp aldy.
Al 4 balanyń ákesi Azamat Nurǵabylovqa Shóptikól aýylynan jaldamaly turǵyn úi berilip, 12 ailyq jaldaý aqysyna sýbsidiia taǵaiyndaldy jáne ózi mal dárigeri bolyp jumysqa ornalasty.
Budan buryn habarlanǵandai, 2020 jyldyń 8 aiynda «Eńbek» memlekettik baǵdarlamasy sheńberinde jalpy sany 4386 adamdy quraityn 1273 otbasy Qazaqstannyń jumys kúshi jetispeitin óńirlerine qonys aýdardy, onyń ishinde 2303 adam eńbekke jaramdy jasta bolyp tabylady.
Otbasynyń eńbekke jaramdy múshelerinen 1652 adam jumyspen qamtylǵan, qalǵandary jastar tájiribesine nemese oqýǵa jiberilgen nemese kásipkerlik qyzmetpen ainalysady. Óz isin bastaý úshin memlekettik grant alǵandar da bar.
Jalpy biyl 5825 adamdy (1631 otbasy) kóshirý josparlanyp otyr.
