Qostanai oblysynda biyl 4 mln tonna astyq jinaldy. Bul týraly búgin Ortalyq kommýnikatsiialar qyzmetindegi baspasóz máslihatynda óńir ákimi Arhimed Muhambetov aitty, dep habarlaidy "Ult aqparat".
«Aýyl sharýashylyǵy oblys ekonomikasynyń ekinshi bazalyq baǵyty sanalady. Onyń jalpy óńirlik ónimdegi úlesi 11,2 paiyzdy quraidy. Salada 126 myńnan astam adam jumys isteidi. Biyl jalpy egistik alqabynyń aýmaǵy 5,3 mln gektardy, onyń ishinde astyq jáne dándi-burshaq daqyldary 4,1mln gektardy qurady. Egistik alqaptary qurylymyn ártaraptandyrýdy jalǵastyrý aiasynda maily daqyldar alqaby 640,5 myń gektarǵa ulǵaityldy. Bul 2019 jylǵy kórsetkishten 132,5 myń gektarǵa kóp. Jalpy bastyrylǵan astyq kólemi 4 mln tonnany qurap, ónimdilik gektaryna 10,2 tsentnerden boldy», - dedi oblys basshysy.
Sonymen qatar, ol biyl memlekettik qoldaý sharalarymen negizgi aýyl sharýashylyǵy daqyldary jáne mal sharýashylyǵy qamtylǵanyn aitty. Agroónerkásip keshenin damytýǵa 38,4 mlrd teńge jumsalǵanyn atap ótti.
«Qaita óńdeýshi kásiporyndar 202 mlrd teńgege taýarlyq ónim óndirdi. ósim 24 paiyzdy quraidy. Bul rette sary mai óndirý 19, irimshik pen súbe 44, sút jáne qoiýlandyrylǵan sút 49, shujyq ónimderi 10, konserviler 84, un 18, jarma 27, ósimdik maiy 17 paiyzǵa artty. Et óndirisi 6,3 paiyzǵa jáne sút 1,7 paiyzǵa ósti. Jyl basynan beri ósimdik maiy eksporty 4 ese artyp, ún eksporty 20 paiyzǵa ósti. 800 myń tonna astyq pen 572 myń tonna un eksportqa shyǵaryldy», - dedi Arhimed Muhambetov.
