Biyl kolledjderde kadr daiyndaý memlekettik tapsyrysy 20 myń orynǵa deiin ulǵaitylady. Bul týraly búgin Úkimet otyrysynda QR Premer-Ministri Asqar Mamin aitty, dep habarlaidy QazAqparat.
«Jastar birinshi mamandyǵyn tegin alýy úshin osy jyly kolledjderde kadr daiyndaý memlekettik tapsyrysyn 20 myń orynǵa deiin ulǵaitýdy qamtamasyz etý kerek. Oblys ákimderi 9 jáne 11 synyp oqýshylaryn aldyn ala kásibi baǵdarlaý boiynsha jumys júrgizsin», - dedi Úkimet basshysy.
Asqar Mamin Bilim jáne ǵylym ministrligine 20 eń myqty joǵary oqý ornyn iriktep, 25 naýryzǵa deiin olardyń tizimin joǵary oqý oryndarynyń básekege qabileti jónindegi keńeste qaraý úshin Úkimetke engizýdi tapsyrdy.
«Bilim berý júiesin keshendi jańǵyrtý básekege qabiletti ekonomikanyń negizgi faktory bolatyn sapaly adami kapital qalyptastyrý úshin qajetti jaǵdai jasaýǵa múmkindik beredi», - dedi Premer-Ministr.
