QR Premer-Ministri Asqar Maminniń tóraǵalyǵymen ótken Úkimettiń selektorlyq otyrysynda 2020-2025 jyldarǵa arnalǵan «Nurly jol» memlekettik baǵdarlamasyn júzege asyrý máseleleri qaraldy, dep habarlaidy "Ult aqparat" primeminister.kz saityna silteme jasap.
2020-2025 jyldarǵa arnalǵan «Nurly jol» memlekettik baǵdarlamasy aiasynda respýblikalyq mańyzy bar avtojoldardyń 100%-yn (21 myń shaqyrym joldy salý, rekonstrýktsiialaý jáne jóndeý), oblystyq jáne aýdandyq mańyzy bar avtojoldardyń 95%-yn (27 myń shaqyrymyn jóndeý) jaqsy jáne qanaǵattanarlyq jaǵdaiǵa keltirý josparlanǵan. 112 infraqurylymdyq joba iske asyrylady, 550 myń turaqty jáne ýaqytsha jumys orny qurylady.
Premer-Ministr biyl jalpy uzyndyǵy 4 myń shaqyrym bolatyn respýblikalyq avtojoldardy salý jáne rekonstrýktsiialaý jumystaryna 200 myńnan astam qazaqstandyq tartylatynyn atap ótti. Taldyqorǵan – Óskemen, Qaraǵandy – Balqash – Qapshaǵai, Qalbataý – Maiqapshaǵai, Merke – Býrylbaital, Úsharal – Dostyq, Aqtóbe – Astrahan, Uzynaǵash – Otar, Petropavl – Resei shekarasy, Qostanai – Denisovka siiaqty ýchaskelerde 2,6 myń shaqyrym jolda qozǵalys ashylady.
«Biyl paidalanýǵa beriletin respýblikalyq mańyzdaǵy joldar kólemi ótken jylǵy kórsetkishpen salystyrǵanda 4 ese artyq. Jergilikti mańyzy bar joldar boiynsha biyl 3,5 myń shaqyrym jol jóndeýden ótkiziledi. Qazaqstan tarihynda buryn-sońdy mundai aýqymda jumys júrgizilgen joq, sondyqtan bizdiń mindetimiz – olardy tolyǵymen oryndaý. Barlyq kúshti jumyldyrý qajet», - dedi A. Mamin.
Úkimet basshysy Indýstriia jáne infraqurylymdyq damý ministrligine ákimdiktermen jáne «QazAvtoJol» UK» AQ-men birlesip, osy jyly josparlanǵan kólemniń ýaqytyly paidalanýǵa berilýin qamtamasyz etýdi, rekonstrýktsiialanǵan 5,7 myń shaqyrym ýchaskelerde (Qapshaǵai – Taldyqorǵan, Qyzylorda – Shymkent – Taraz, Nur-Sultan – Pavlodar jáne t. b.) avtomobil joldarynda tólem júiesin engizý jumysyn aiaqtaýdy tapsyrdy.
«Qurylys maýsymyn múmkindiginshe tiimdi paidalaný qajet. Jekelegen eldi mekenderde karantin rejimine bailanysty engizilgen shekteýler jaǵdaiynda nysandarǵa janar-jaǵarmai, jol-qurylys materialdary men tehnikasyn esh kedergisiz jetkizý úshin “jasyl dáliz” jumysyn qamtamasyz etý qajet», — dep A. Mamin, otandyq qurylys indýstriiasynyń qolda bar múmkindikterin barynsha paidalanýdy tapsyrdy.
Premer-Ministr elimizdiń tranzittik áleýetin barynsha paidalanýdyń jáne onyń artýyna barlyq kólik túrleriniń (avto- jáne temir jol kóligimen konteinerlerdi tasymaldaý, áýe júk tasymaldary), sondai-aq barlyq negizgi operatorlardyń - QTJ, QazAvtoJol, Qazaeronavigatsiianyń yqpal etýiniń mańyzdylyǵyn atap ótti.
«Indýstriia jáne infraqurylymdyq damý ministrligine tranzittik aǵymdy qoldaý jáne yntalandyrý úshin qajetti sharalardy qolǵa alýdy tapsyramyn», — dedi A. Mamin.
Úkimet basshysy biyl memlekettik baǵdarlamada qarastyrylǵan Shymkent áýejaiynyń jolaýshylar terminalynyń jáne Túrkistandaǵy halyqaralyq áýejaidyń qurylysyn aiaqtaýdy, sondai-aq Óskemen, Úsharal jáne Úrjar áýejailaryn rekonstrýktsiialaý jumysyn bastaýdy tapsyrdy.
«Temir jol kóligi salasynda vagon parkin jańartý jáne magistraldyq temir jol jelisiniń tozýyn tómendetý boiynsha, sondai-aq sý kóligi salasynda keme qatynasy shliýzderine kúrdeli jóndeý júrgizý boiynsha jańǵyrtý jumystaryn jalǵastyrý qajet», — dedi A. Mamin.
Úkimet basshysy biyl «Nurly jol» aiasynda iske asyrý josparlanǵan barlyq is-sharalar belgilengen merzimde aiaqtalýy tiis ekenin aitty.
Aita keteiik, Jiynda Indýstriia jáne infraqurylymdyq damý ministri Beibit Atamqulov, Shyǵys Qazaqstan oblysynyń ákimi Danial Ahmetov, Qaraǵandy oblysynyń ákimi Jeńis Qasymbek, Atyraý oblysynyń ákimi Mahambet Dosmuhambetov jáne t.b. baiandama jasady.
