Kentaý qalasynda 2022 jyldyń 9 aiynda ónerkásip óniminiń kólemi 30,2 mlrd. teńgege jetken. Bul týraly óńirlik kommýnikatsiialar qyzmetinde ótken brifingte Kentaý qalasynyń ákimi Jandos Tasov málimdedi.
Shahar basshysynyń aitýynsha, biyl negizgi kapitalǵa tartylǵan investitsiia kólemi 22,3 mlrd.teńgege jetip, jospar 27,4 paiyzǵa artyǵymen oryndalǵan.
«Kentaý qalasyndaǵy indýstrialdyq aimaq 25 ga jerdi quraidy. Ol aimaqta quny 2,7 mlrd.teńgeni quraityn, 219 jumys ornyn qamtityn, 8 joba ornalasqan. Kentaý qalasy boiynsha 2020-2025 jyldary óńirlerdiń kásipkerligin qoldaý kartasy aiasynda iske asyrylatyn jalpy quny 6,33 mlrd. teńgege 2 joba iske qosylady. Onda 317 jumys orny ashylý josparlanǵan», - dedi Jandos Qalmyrzauly.
Biylǵy 9 aida qalada 21,8 myń sharshy metr turǵyn úi paidalanýǵa berilgen. Kentaý qalasy men oǵan qarasty aýyldar 100% aýyzsýmen qamtylǵan, tolyq ortalyqtandyrylǵan elektr jelisine qosylǵan. Biyl jyl sońyna deiin 18 myń abonentti tabiǵi gazǵa qosý josparlanyp otyr. Aita keterligi, qazirgi tańda, Saýran aýdany aýmaǵynan jalpy kólemi 75,5 myń ga. jaiylymdyq jerdi Kentaý qalasyna qosý jolymen shekarany 128,3 myń ga. ózgertý boiynsha tiisti jumystar atqarylýda.
Kentaý qalasynyń kóshelerin jaryqtandyrý jáne qaita jańǵyrtý maqsatynda jumystar atqarylýda. Smetalyq qujattamaǵa sáikes, 85 kóshege 1 070 dana jaryqsham ornatyldy. Qosymsha biyl jyl sońyna deiin 200 dana jaryq baǵanasyn ornatý josparlanǵan. Nátijesinde Kentaý qalasynyń kósheleriniń 90%-y jaryqtandyrylady.
Sondai-aq shaharda jalpy ishki joldar 268 kósheni, iaǵni 173,5 shaqyrymdy quraidy, onyń ishinde, asfaltty 175 kóshe (77,3%), qiyrshyq tasty 88 kóshe (19%) jáne topyraqty 5 kóshe (3,7%) bar. Biyl Kentaý qalasynda 46 kóshe jóndeýden ótkizildi. Bul - oblysta eń úzdik kórsetkishtiń biri. «Aýyl – El besigi» jobasy aiasynda Qarnaq aýylynyń 10 kóshesin ortasha jóndeý jumystary aiaqtalyp, paidalanýǵa berildi. Memlekettik jekeshelik áriptestik (GChP) aiasynda 2020-2025 jyldary 128 kósheni jóndeýden ótkizý jáne kútip ustaý jumystary josparlanǵan.
Aita keteiik, Kentaýda 103 myńnan asa halyq turady. Qalaǵa qarasty 4 aýyl bar.
