Foto: gov.kz
Týrizm jáne sport ministri Erbol Myrzabosynovtyń tóraǵalyǵymen ótken keńeste jazǵy týristik maýsymnyń qorytyndysy shyǵaryldy. Jiynǵa oblys ákimderiniń orynbasarlary men óńirlik basqarma basshylary qatysty. Bul týraly Týrizm jəne sport ministrligi habarlady.
"Biyl týrizm taqyryby birneshe ret kóterilip, keńinen talqylandy. Ókinishke qarai, árdaiym oń nátije bola bermedi. Memleket basshysy kýrortty óńirlerdi jazǵy týristik maýsymǵa daiyndyq deńgeiiniń qanaǵattanarlyqsyz ekenin atap ótti. Prezidenttiń tapsyrmasy boiynsha birqatar kýrortty óńirge tekseris júrgizildi. Nátijesinde qajetti jaǵdailardy uiymdastyrýda eleýli kemshilikter bar ekenin anyqtaldy", – dedi ministr.
Osy jyly elimizdiń 8 iri demalys aimaǵynda, atap aitqanda, Baianaýyl, Katonqaraǵai, Kaspii teńizi jaǵalaýy, Balqash pen Alakól kólderi (Alakóldiń Abai jáne Jetisý oblystaryndaǵy jaǵalaýy), Qapshaǵai jáne Shýche-Býrabai kýrortty óńirlerinde keshendi túgendeý júrgizildi.
Taldaý nátijesinde injenerlik infraqurylymnyń jetkiliksizdigi, beibereket saýdany retteý, jaǵajailardy aimaqtarǵa bólý, elektrmen úzdiksiz jabdyqtaý, qaýipsizdik erejelerin qatań saqtaý jáne qutqarý beketteriniń sanyn kóbeitý qajet ekeni belgili boldy.
Taldaý qorytyndysy boiynsha, qutqarýshylar sanyn arttyrý, qutqarý beketterin zamanaýi jabdyqpen qamtý, inspektorlardyń turaqty kezekshiligin uiymdastyrý jáne sý kóligine baqylaýdy kúsheitý usynyldy.
Jergilikti atqarýshy organdardyń týrizmdi damytýǵa arnalǵan shyǵyndary – 1 mlrd teńge (+72%). Buǵan memlekettik qyzmetkerlerdiń eńbekaqysy, ákimshilik ǵimarattardy ustaý, kommýnaldyq tólemder kiredi.
Qazaqstannyń týristik imidjin qalyptastyrýǵa – 0,9 mlrd teńge (+49%). Munda halyqaralyq forýmdar men kórmelerdi ótkizý, shetelde roýd-shoýlar men marketingtik naýqandar qamtylýy yqtimal.
Týristik saladaǵy kásipkerler shyǵyndaryn óteýge – 0,7 mlrd teńge (+28%).
Shýchinsk–Býrabai aimaǵynyń týristik imidjine – 0,4 mlrd teńge (+44%).
Jalpy alǵanda týrizmge baǵyttalǵan shyǵyndar aitarlyqtai ósse de, memlekettik biýdjet qurylymyndaǵy úlesi óte tómen – 0,04% ǵana (2024 jyly – 0,03%).
2025-2028 jyldarǵa arnalǵan kýrortty óńirlerdi damytý jónindegi Jol kartasynyń jobasyn ázirledi. Jobaǵa 141 is-shara engizilgen. Sondai-aq jobany júzege asyrý respýblikalyq jáne jergilikti biýdjetterden jáne jeke investitsiia esebinen qarjylandyrý kózdelgen.
