Biylǵy 8 aida otandyq kásiporyndar 1 118 traktor jáne 736 kombain qurastyrdy, dep habarlaidy "Ult aqparat".
«Qazaqstanda aýyl sharýashylyǵy mashinasyn jasaý óndirisiniń kólemi 2019 jyldyń qorytyndysynda 122,4 mlrd teńgeni qurap, 1849 traktor men 791 kombain shyǵarylǵan edi. Biylǵy 8 aidyń qorytyndysynda otandyq kásiporyndar 20,3 mlrd teńgege 1 118 traktor jáne 34,7 mlrd teńgege 736 kombain qurastyrdy. Bul ótken jyldyń sáikes kezeńimen salystyrǵanda 2 ese artyq», - delingen Indýstriia jáne infraqurylymdyq damý ministrliginiń málimetinde.
Atalǵan vedomstvo otandyq óndiristiń aýyl sharýashylyǵy tehnikasyn satyp alýdy yntalandyrý maqsatynda traktorlar men kombaindarǵa jeńildikti lizing baǵdarlamasyn iske asyrýda. Baǵdarlamanyń negizgi sharttary boiynsha tehnika qunynyń 15% bastapqy jarnasymen 7 jylǵa 7%-ben lizing alýshyǵa qarjylandyrý usynylady. 2018 jyly bul maqsatqa respýblikalyq biýdjetten 3 mlrd teńge, 2019 jyly 3,5 mlrd teńge jáne 2020 jyly 6,5 mlrd teńge bólindi.
Salany ári qarai qoldaý maqsatynda jeńildikti lizing baǵdarlamasy aiasynda «QDB-Lizing» AQ arqyly traktorlar men kombaindarǵa 2021-2025 jyldarǵa 13,5 mlrd teńge mólsherinde qosymsha qarajat bólý usynylyp otyr.
