Aldaǵy oqý jylynda Qazaqstannyń eki myńǵa jýyq mektebi 10-ynshy jáne 11-inshi synyptar úshin birneshe pándi aǵylshyn tilinde oqyta bastaidy. Bul týraly QR Bilim jáne ǵylym vitse-ministri Ashat Aimaǵambetov málimdedi, dep habarlaidy QazAqparat tilshisi.
Ministrlik júrgizgen zertteýlerge sáikes, qazaqstandyqtardyń 80% pánderdi aǵylshyn tilinde oqytý kerek dep esepteidi. Jalpy 91% aǵylshyn tilin úirenýdi óte ózekti dep sanaidy.
«1 qyrkúiekke aǵylshyn tilin V2 deńgeiinde biletin 7 myń pedagog daiyn bolady. Olar 1 qyrkúiekten bastap, tórt pándi (himiia, fizika, biologiia, informatika) aǵylshyn tilinde bere bastaidy. Sondyqtan, 2018-2019 oqý jylynda jalpy bilim beretin shamamen 2 myń mektep nemese mektepter sanynyń 41 protsenti 10-11-inshi synyptarǵa bir nemese tórt pándi aǵylshyn tilinde oqytýdy bastaidy», - dedi Ashat Aimaǵambetov «Nur Otan» partiiasynda ótken is-sharada.
Onyń aitýynsha, bilim berýdi aǵylshyn tiline kóshirýdiń ózindik tásilderi bar jáne oqýshylardyń daiyndyq deńgeii de eskerilýi tiis.
«Bastaidy dep ádeii aityp otyrmyn. Sebebi bul eki myń mektep qyrkúiekten bastap, avtomatty túrde aǵylshyn tilinde oqytýǵa tolyq kóshpeidi. Munda arnaiy metodika men tehnologiiamyz bar. Máselen, bizdegi qazaq-túrik litseileri alǵashynda terminologiiany oqytýdan bastady, keiinirek oqý baǵdarlamasynyń - 25%, keiinirek - 50%, odan keiin - 75%, osylaisha 100% aǵylshyn tilinde oqytýǵa kóshti. Sondyqtan, oqýshylardyń daiyndyǵyn da eskergen jón», - dedi vitse-ministr.
Málim etilgendei, 2019-2020 jyldary aýdan ortalyqtaryndaǵy tolyq jasaqtalǵan mektepter, qalalar men arnaiy mamandandyrylǵan bilim berý uiymdary (respýblika mektepteriniń shamamen 65%) aǵylshyn tilinde sabaq berýge kóshedi.
«Bul mektepterde shamamen 12 myń pedagog jumys isteidi. 12 myń pedagogty kelesi jylǵa deiin daiyndaýdy josparlap otyrmyz», - dedi A. Aimaǵambetov.
