Biyl qazaq tili men ádebieti pánderiniń oqý baǵdarlamasy jańartylady. Bul týraly QR bilim jáne ǵylym ministri Ashat Aimaǵambetov aitty, dep habarlaidy QazAqparat.
«Eń basty másele osy eki pánniń (qazaq tili men ádebieti) oqý baǵdarlamasyn jańartý bolatyn. Olardyń oqý baǵdarlamasyn mindetti túrde jańartýymyz kerek. Jinalysqa (Qazaq tili jáne ádebieti páni muǵalimderi sezi) kelgen barlyq muǵalimniń kótergen máselesi de osy. Qazaq ádebietiniń mazmuny bolsyn, qazaq tili pániniń mazmuny bolsyn, árine biraz jetildiretin másele bar. Sondyqtan jumys tobynyń otyrystarynda aitylǵan búkil másele sheshimin tabýy kerek. Onyń ishinde oqý baǵdarlamasynyń maqsattaryn qaita qaraý máselesi de kóterilgen edi. Oqytylatyn shyǵarmalar, grammatikalaý júiesi, jas erekshelikterin eskerý jáne basqa da máselelerdi áriptesterimiz kóterdi. Sol sebepti osy problemalardy sheshýdi ári qarai jalǵastyrý kerek. Muny osy jyly mindetti túrde tolyq sheshýimiz qajet», - dedi ol Bilim ministrliginiń apparat jinalysynda.
Ministrdiń atap ótýinshe, sezd barysynda basqa da máseleler kóterildi. Ol máseleler de ýaqyty kelgende jan-jaqty pysyqtalaty bolady.
